مۆرینۆ بووە راهێنەری مۆناکۆ
رووداو - هەولێر
یانەی مۆناکۆ دوای دوورخستنەوەی لیۆناردۆ جاردیمی راهێنەری یانەکەی دوای چەند کاژێرێک راهێنەرێکی نوێی دەستنیشانکرد.
بەهۆی ئەنجامە خراپەکانی مۆناکۆ لە خولی فەرەنسادا، یانەکە لیۆناردۆ جاردیمی راهێنەری یانەکەی لە پۆستەکەی دوورخستەوە، و ئەمڕۆش یانە فەرەنسییەکە رۆبێرت مۆرینۆی راهێنەری پێشووی هەڵبژاردەی ئیسپانیای بە راهێنەری نوێی یانەکەی دەستنیشانکرد.
مۆناکۆ لە پێگەی فەرمی یانەکەی بڵاویکردووەتەوە کە گرێبەستەکەی مۆرینۆ تاوەکو ساڵی 2022 دەبێت و هەفتەی داهاتوو ئەرکی مەشقی یانەکەیان لە ئەستۆ دەگرێت.
مۆرینۆ لە شەش یاری پاڵاوتنی یۆرۆی 2020دا بووە راهێنەری هەڵبژاردەی ئیسپانیا و هەڵبژاردەکەی بە ئاسانی گەیاندە یۆرۆ.