ڤیدیۆ؛ پاڵەوانێتیی کراوەی ئەمریکا دەستیپێکرد و جۆکۆ مێژووی تۆمارکرد

 

 

جۆکۆ لە یەکەم دەرکەوتنیدا لە یاریگەی ئارسەر ئاش، کە یاریگەی سەرەکی پاڵەوانێتییەکەیە بەرامبەر ئەلیکساندەر مولەری فەرەنسی یارییکرد.

 

نۆلێ بە ئەزموونە زۆر و ورە بەرزییەکەی هەر زوو کۆمەڵەی یەکەمی بە شەش سفر بردەوە.

 

لە کۆمەڵەی دووەم و سێیەمدا رکابەرەکەی هیچی پێنەکرا، جگە لەوەی خاڵێکی جوانی تۆمارکرد.

 

جۆکۆڤیچ یارییەکەی بە شەش سفر، شەش دوو و شەش سێ بردەوە و گەڕایەوە پێشەنگی ریزبەندی باشترینەکانی جیهان و 390 هەفتە لە پێشەنگی ریزبەند بووە کە ئەمە ژمارەیەکی پێوانەییە.

 

دۆمینیک تیمی تێنسزانی بەنێوبانگی نەمسا، لە یەکەم یارییدا سەرکەوتنی بەرامبەر ئەلیکساندەر بوبلیکی کازاخستانی بەدەستهێنا و خۆی گەیاندە قۆناخی دووەم.

 

یاریی نێوان هەردوو تێنسزان کەمتر لە دوو کاژێری خایاند و تیم بە سێ کۆمەڵەی بێبەرامبەر بە شەش سێ، شەش دوو و شەش چوار شوێنی خۆی لە قۆناخی داهاتوودا کردەوە و لە قۆناخی دووەمدا بەرامبەر بێن شێلتۆنی ئەمریکی یارییدەکات.

 

مارتن ڤوکسۆڤیچ، تێنسزانی هەنگاری لە یارییەکی زەحمەتدا بە سێ کۆمەڵەی بەرامبەر دوو کۆمەڵە سەرکەوتنی بەرامبەر سێباستیان کوردای ئەمریکی بەدەستهێنا و گەیشتە قۆناخی داهاتوو.

 

ئەنجامی کۆمەڵەکانی ئەم یارییە حەوت شەش، چوار شەش، حەوت شەش، چوار شەش و شەش چوار بوون.

 

لە قۆناخی داهاتوودا ڤوکسۆڤیچ بەرامبەر رینکی هیجیکاتای ئوسترالی یارییدەکات.

 

تایلەر فریتزی ئەمریکی و نۆیەمی ریزبەند، سەرکەوتنی بەرامبەر ستیڤ جونسۆنی هاونیشتمانی بەدەستهێنا و شوێنی خۆی لە قۆناخی دووەمدا کردەوە.

 

فریتز بە سێ کۆمەڵەی بێبەرامبەر و بە ئاسانی، بە شەش دوو، شەش یەک و شەش دوو یارییەکەی بردەوە و رووبەڕووی خوان پابلۆ ڤاریاسی پێرۆیی دەبێتەوە.

 

 

لەسەر ئاستی خانمان کارۆلین ڤۆژنیاکیی دانیمارکی بەهێزەوە لە رکابەرییەکەدا دەرکەوت و بە کاژێرێک و 31 خولەک سەرکەوتنی بەرامبەر تاتیانا پرۆزۆرۆڤای رووسی بەدەستهێنا.

 

کارۆلین لە 2020ـەوە لە یاریگەکان دوورکەوتبووەوە، ئەم مانگە گەڕایەوە و یارییەکەی بە شەش سێ و شەش دوو بردەوە و گەیشتە قۆناخی داهاتوو.

 

 

ئیگا شیڤاتیکی پۆڵەندی و پاڵەوانی وەرزی رابردووی پاڵەوانێتیی کراوەی ئەمریکا، لە یەکەم دەرکەوتنیدا لە پاڵەوانێتییەکەدا، سەرکەوتنێکی ئاسانی بەدەستهێنا و لە ریبیکا پێترسنی سوێدیی بردەوە.

 

یەکەمی ریزبەندی جیهان بە کەمتر لە کاژێرک و لە 58 خولەکدا یارییەکەی تەواوکرد، کاتێک بە دوو کۆمەڵەی بێبەرامبەر شەش سفر و شەش یەک گەیشتە قۆناخی داهاتوو.

 

لە قۆناخی دووەمدا شیڤیاتیک بەرامبەر داریا ساڤیلی ئوسترالی یارییدەکات.

 

لە یارییەکی دیکەی خانماندا، یێلینا ریباکینای تێنسزانی کازاخستانی و چوارەمی ریزبەندی جیهان، بەرامبەر مارتا کۆستیۆکی ئۆکراینی یارییکرد و گەیشتە قۆناخی دووەمی پاڵەوانێتیی کراوەی ئەمریکا.

 

لە یارییەکەدا ریباکینا ئاستێکی بەرزی پێشکێشکرد و کاژێرێک و 27 خولەکی پێویست بوو بۆ ئەوەی شەش دوو و شەش یارییەکە یەکلابکاتەوە و بگاتە قۆناخی داهاتووی پاڵەوانێتییەکە.