فەرمی.. پۆچێتینۆ بووە راهێنەری چێڵسی

 

 

یانە ئینگلیزییەکە لەسەر ماڵپەری فەرمی خۆی گرێبەستکردنی لەگەڵ ئەو راهێنەرە بۆ دوو ساڵ لەگەڵ ئەگەری نوێکردنەوەی گرێبەستەکەی بۆ ساڵی سێیەم راگەیاند و لە رۆژی 1-7-2023ـەوە بەفەرمی وەک راهێنەری یانەکە دەست بەکاردەبێت.

 

هەریەکە لە لاورێنس ستیوارت و پاوڵ وینستانلێی بەڕێوەبەرە هاوبەشەکانی یانەی چێڵسی دەڵێن "ئەزموونی کارکردنی پۆچێتینۆ تایبەتمەندییەکانی سەرکردایەتیکردنی دەبنە هاوکارێکی زۆرباش بۆ یانەکە، بەتایبەت کە ئەو لە ئاستە بەرزەکاندا و لە خولی جیاوازدا کاریکردووە، ئەوەش هاوکاردەبێت بۆ ئەوەی تۆپی پێی چێڵسی پێشکەوتن بەخۆیەوە ببینێت."

 

بەڕێوەبەرایەتیی یانەی چێڵسی دەڵێت "پۆچێتینۆ راهێنەرێکی بەنێوبانگ و سەرکەوتووە، خۆشحاڵین کە ئەو پەیوەندی بە یانەی چێڵسییەوە دەکات و پێشینەیەکی نایابی هەیە و بەوپەڕی خۆشحاڵییەوە چاوەڕێی دەکەین بۆ ئەوەی لەگەڵ تیپەکە بێت."

 

ماوریسیۆ پۆچێتینۆ پێشتر لە پرێمەرلیگ کاریکردووە و راهێنەری یانەی تۆتێنهام بووە، جارێک ئەو یانەیەی گەیاندووەتە یاریی کۆتایی خولی یانە پاڵەوانەکانی ئەوروپا، پاشان بووەتە راهێنەری یانەی پاریس سانجێرمانی فەرەنسی و لەگەڵ ئەو یانەیە سێ نازناوی جیاوازی بردووەتەوە.