حکومەتی هەرێمی کوردستان 400 ملیۆن دینار بۆ یەکێتیی تۆپی پێی کوردستان خەرج دەکات

 

 

بەپێی راگەیێنراوێکی حکومەتی هەرێمی کوردستان کە رۆژی هەینی 29-4-2022 بڵاوکراوەتەوە، دابینکردنی ئەو بڕە پارەیە، بەمەبەستی "بەردەوامبوون و ئەنجامدانی چالاکییە وەرزشییەکانی یەکێتیی تۆپی پێی کوردستانە بۆ وەرزی 2021 - 2022."

 

هەروەها لە بڵاوکراوەکەوی فەرمانگەی زانیاری حکومەتی هەرێمی کوردستان هاتووە: "جگە لە پاڵپشتی دارایی یەکێتی تۆپی کوردستان،  بڕی گوژمەی دیاریکراویش لەسەر بودجەی وەزارەتی رۆشنبیری و لاوان / بەڕێوەبەرایەتی گشتی وەرزش خەرج دەکرێت".

 

ساڵانە یەکێتی تۆپی پێی کوردستان بە پشتبەستن بە پاڵپشتی دارایی کە لەلایەن حکومەتی کوردستانەوە دەکرێت، چالاکییە وەرزشییەکان لەسەر ئاستە جیاجیاکانی تەمەن بۆ وەرزشوانانی پیاوان و خانمان بۆ یاری تۆپی پێ و فوتساڵ رێکدەخات. 

 

هەروەها بەشێک لەو داهاتە تەرخان دەکرێت بۆ پاداشتکردنی یانە بەشداربووەکان و پاڵەوانی خولەکە، جگە لە پاداشتی دارایی ناوبژیوانان و سەرپەرشتیارانی یارییەکان لەسەر ئاستی خولی پلە نایاب، پلە یەک و پلە دوو، جگە لە یانە بەشداربووەکانی خولی نایابی فوتساڵی خانمان.