مێسی بەرامبەر بۆلیڤیا یاریی دەکات؟ سکالۆنی وەڵامدەداتەوە
رووداو دیجیتال
بەشێکی زۆری هەوادارانی هەڵبژاردەی ئەرجەنتین شەونخوونی دەکەن ئەو رۆژانەی تانگۆ یاریی هەیە، بۆ ئەوەی بەرەبەیان سەیری یاریی هەڵبژاردە دڵخوازەکەیان بکەن، بەڵام پرسیار ئەوەیە ئەگەر بەرەبەیانی سێشەممە لیۆنێل مێسی یاریی نەکات، ئەوان هەر شەونخوونی دەکەن یان نا؟.
ئەمڕۆ دوایین دوو یاری قۆناخی کۆمەڵەکانی کۆپا ئەمریکا بەڕێوەدەچن و ئەرجەنتینیش هەوڵدەدات سەرکەوتنێکی نوێ پێشکەشی جەماوەرەکەی بکات، بەر لەوەی دەست بە قۆناخی 16 بکات، کە پێشتر بلیتەکەی وەرگرتووە.
هەردوو یارییەکە کاژێر 03:00ـی بەرەبەیان دەکرێن، لە یەکەمیاندا هەڵبژاردەی ئەرجەنتین لەگەڵ هەڵبژاردەی بۆلیڤیا یاریدەکات و لە یاریی دووەمیشدا ئۆرۆگوای و پاراگوای رووبەڕووی یەکدی دەبنەوە،
ئەرجەنتین بە کۆکردنەوەی 7 خاڵ یەکەمی کۆمەڵەکەیەتی و بۆ قۆناخی داهاتوو سەرکوتووە، ئەم یارییەشی بۆ یەکلاکردنەوە و مسۆگەرکردنی پێشەنگی کۆمەڵەی یەکەمە
بۆلیڤیاش لەم پاڵەوانێتییە بێهیوا بووە و لە 3 یاریدا لەسەرجەمیاندا دۆڕاوە.
پرسیار ئەوەیە ئایا لیۆنێل مێسی ئەستێرە و کاپتنی تانگۆ بەشداری لەم یارییەدا دەکات یان نا؟ کە زۆر پێویستی بە پشوودانە و یارییەکە هیچ بایەخێکی نییە بۆ ئەرجەنتین؟.
لیۆنێل سکالۆنی، راهێنەری هەڵبژاردەی ئەرجەنتین وەڵامی ئەو پرسیارە دەداتەوە و دەڵێت "لە هەڵبژاردەکەماندا تەنیا یەک یاریزان هەیە کە شوێنی لە پێکهاتەکەماندا مسۆگەرە، هەمووان دەزانن ئەو کێیە؟"، کە بێگومان مەبەستی لیۆنێل مێسییە.
ئەو راهێنەرە پاساوی بۆ ئەوە هێنایەوە کە ئەرجەنتین بە بایەخەوە ئەم یارییەی ئەنجام دەدات و گوتی "هەرچەندە گرنگی بەو ئامارانە نادەم کە بڵێت هەڵبژاردەی ئەرجەنتین ئەوەندە یارییە بەبێ دۆڕان ئەنجام داوە، بەڵام بەدڵنیاییشەوە ئەگەر هەر یارییەک ببەینەوە متمانەی زیاترمان پێدەبەخشێت".
یارییەکەی دیکەش لە نێوان هەردوو هەڵبژاردەی ئۆرۆگوای و پاراگوایدا دەبێت، هەردوو هەڵبژاردە سەرکەوتوون بۆ قۆناخی هەشت، بەڵام ئەوەی دەیانەوێت بەدەستهێنانی پلەیەکی باشترە بۆ ئەوەی لە قۆناخی داهاتوودا ئەرکیان ئاسانتربێت.