ڤیدیۆ؛ پاڵەوانێتییەکی عەرەبی بە تامی جیهانی دەستپێدەکات

 

 

پاڵەوانێتییەکە بەبەشداریی 16 یانەی وڵاتانی عەرەبی لەسەر ئاستی کیشوەری ئاسیا و ئەفریقا بەڕێوەدەچێت، سەرجەم یارییەکانی لە سعودیە دەکرێن و ئەمساڵ پاڵەوانێتییەکە تەواو جیاواز دەبێت، بەهۆی ئەو گرێبەستە سەرنجڕاکێشانەی یانەکانی سعودیە ئەنجامیانداون، بەشداریکردنی کریستیانۆ رۆناڵدۆ و کەریم بنزیماش هێزێکی زیاتر دەداتە رکابەرییەکە.

 

ئەمرۆ یارییەکانی گەڕی یەکەمی قۆناخی کۆمەڵەکانی پاڵەوانێتییەکە دەکرێن، کاژێر 20:00 یانەی هیلالی سعودی دوای ئەنجامدانی چەند گرێبەستێکی سەرنجڕاکێش و گواستنەوەی هەریەکە لە خالیدۆ کۆلیبالی، رۆبن نێڤێس، میلینکۆڤیچ ساڤیچ و مالکۆم ئۆلیڤێرا لە یەکەم یارییدا بەرامبەر یانەی ئەهلی تەرابلسی لیبی یارییدەکات.

 

هیلال لە وەرزی رابردووی خولی سعودییەدا، نەیتوانی بە ئاستێکی بەرزەوە دەربکەوێت و هەر زوو لە رکابەرییەکە دوورکەوتەوە، لەکاتێکدا دووەمی مۆندیالی یانەکان بوو، بۆیە بۆ ئەم وەرزە گۆڕانکارییەکی گەورەی کردووە و دەیەوێت بەسەرکردایەتی خۆرخی خیسۆس ئەم پاڵەوانێتییە بکاتە سەرەتای گەڕانەوەی بۆ نێو رکابەرییەکان.

 

لە دوایین یاریی ئەمشەودا کە لە رکابەرییەکانی کۆمەڵەی یەکەم و کاژێر 22:00 دەکرێت، هەمووان چاوەڕێی یەکەم دەرکەوتنی کەریم بنزیما، ئەستێرەی فەرەنسی و یاریزانی نوێی یانەی ئیتیحاد دەکەن، کاتێک بەرامبەر یانەی تەرەجی تونسی یارییدەکات.

 

بنزیما دوای چەندین ساڵی دوور و درێژ لە ئەوروپا، کاروانەکەی هاوشێوەی کریستیانۆ رۆناڵدۆ بردە سعودییە و قۆناخی نوێی لەگەڵ پاڵەوانی وەرزی رابردووی خولی وڵاتەکە تاقیدەکاتەوە، کە لە دوای ئەویش ئیتیحاد هەریەکە لە ئێنگۆلۆ کانتێ و جواو پێدرۆی ناسراو بە جۆتای گواستەوە.

 

ئیتیحاد بە نوێنەرایەتیی سعودیە بەشداری لە یارییەکانی مۆندیالی یانەکاندا دەکات، ئەم پاڵەوانێتییەکە دەبێتە قۆناخێکی دیکەی ئامادەکاری بۆ پێکهاتەی نونۆ سانتۆی راهێنەری پۆرتوگالی و یانە سعودییەکە.