رۆجێر فێدێرێر بووە پاڵەوان و ریکۆردێکی مێژوویی تۆمارکرد
رووداو - هەولێر
رۆجێر فێدێرێری سویسری، نازناوی پاڵەوانێتی تێنسی هالەی بەدەستهێنا و ریکۆردێکی مێژوویی بەناوی خۆی لە پاڵەوانێتییەکەدا تۆمارکرد.
لە یاریی کۆتایی پاڵەوانێتییەکەدا فێدێرێر رووبەڕووی ئەلیکساندەر زڤێریڤی ئەڵمانی بوویەوە و توانیی یارییەکە بەئاسانی و بە دوو کۆمەڵەی بێبەرامبەر لە ماوەی تەنیا 53 خولەکدا لەبەرژەوەندی خۆی یەکلایبکاتەوە و نازناوی پاڵەوانێتییەکە بەدەستبهێنێت، ئەنجامی کۆمەڵەکانیش 6-1 و 6-3 بوون.
فێدێرێر بەبردنەوەی نازناوی پاڵەوانێتییەکە ریکۆردێکی مێژوویی بەناوی خۆی تۆمارکرد و بووە یەکەم تێنسزان 9 جار نازناوی تێنسی هالەی بردبێتەوە، جگە لەوەی 500 خاڵ چووە سەر خاڵەکانی ئەو تێنسزانە 35 ساڵە لە ریزبەندی گشتی تێنسزاناندا.