ئەمڕۆ چامپیۆنزلیگە و چوار یاری دەکرێن

 

 

ئەمڕۆ بە ئەنجامدانی چوار یاری، رکابەرییەکانی گەڕی سێیەمی چامپیۆنزلیگی بژاردەی ئاسیا دەستپێدەکات، یانەی شورتەی عێراقی لە یاریگەی کەربەلا میوانداریی یانەی پاختاکۆری ئۆزبەکستانی دەکات و دەیەوێت یەکەم بردنەوە تۆمار بکات.

 

شورتە لە دوو یاریی رابردوودا، یەکسانبوونێکی بەرامبەر نەسڕی سعودی هەبووە و یارییەکیشی بە پێنج گۆڵی بێبەرامبەر یانەی هیلالی سعودی دۆڕاندووە، ئەمڕۆ دەیەوێت یەکەم بردنەوە لە رکابەرییەکەدا تۆمار بکات.

 

یارییەکە کاژێر 19:00 بەڕێوەدەچێت، ئەحمەد سەڵاح، راهێنەری یانەی شورتە بەر لە یارییەکە گوتی "هەموو شتەکان ئەرێنین بۆ یارییەکە، دەمانەوێت قەرەبووی دۆڕانەکەی بەرامبەر هیلال بکەینەوە و بە بیرکردنەوەیەکی بەهێزەوە یارییەکە ئەنجامدەدەین."

 

راهێنەری شورتە زیاتر گوتی "یارییەکە بەشێوەیەکی زۆر جیاواز لە یارییەکانی خول ئەنجامدەدەین و دەمانەوێت هەموو ئەو هەڵانە چارەسەر بکەین کە لە یارییەکانی رابردوودا کردوومانە."

 

لە یارییەکی دیکەدا کە هەمان کات بەڕێوەدەچێت، هەردوو یانەی عەینی ئیماراتی و هیلالی سعودی رووبەڕووی یەکدەبنەوە.

 

هیلال هەردوو یاریی رابردووی بردووەتەوە و دەیەوێت سێیەم بردنەوەی لەسەریەک تۆماربکات، سەرەڕای ئەوەی لە دەرەوەی یاریگەی خۆی یاری دەکات، لە بەرامبەردا عەین لە دوو یاریی رابردوودا دۆڕانێک و یەکسانبوونێکی هەیە و چاوی لەوەیە سوود لە یاریگە و هاندەرانی وەربگرێت بۆ ئەوەی یەکەم بردنەوە لە وەرزی نوێدا تۆماربکات.

 

لە وەرزی رابردوودا هەردوو یانە لە قۆناخی پێشکۆتاییدا رووبەڕووی یەکبوونەوە و عەین بە هەردوو یاریی چوون و گەڕانەوە 5-4 لە یانە سعودییەکەی بردەوە و دوای ئەوەش بووە پاڵەوانی چامپیۆنزلیگی ئاسیا، بۆیە یارییەکەی ئەمشەو بۆ هەردوولا زۆر تایبەت و سەرنجڕاکێش دەبێت.

 

هیلال لەکاتێکدا ئەم یارییە ئەنجامدەدات، لەم وەرزەدا لە کۆی 9 یاری لەسەر ئاستی سعودیە و ئاسیا، سەرجەم یارییەکانی بردووەتەوە و هیچ یارییەکی نەدۆڕاندووە، ئەمشەو یانەکە دەیەوێت بردنەوەیەکی دیکە تۆماربکات و درێژە بە ئەنجامە باشەکانی بدات.

 

هەر لە چامپیۆنزلیگی بژاردەی ئاسیا، یانەی سەدی قەتەری بەرامبەر پێرسپۆلیسی ئێرانی یاری دەکات و رەیانی قەتەری میوانداری یانەی ئەهلی سعودی دەکات.