ئێمباپێ دەچێتە ریال مەدرید

 

 

ماوەی چەندین ساڵە بابەتی پەیوەندیکردنی کیلیان بە ریال مەدریدەوە میدیاکانی بەخۆیەوە سەرقاڵکردووە، بەپێی هەواڵەکان، ساڵی 2022 یانەی ریال مەدرید گرێبەستێکی پێشکێش بە ئەستێرە فەرەنسییەکە کرد، بەڵام ئەو رەتی کردەوە و گرێبەستەکەی لەگەڵ پاریس سانجێرمان نوێکردەوە. 

 

بەپێی رۆژنامەی مارکای ئیسپانی، لە کۆتایی ئەم وەرزەدا، ئێمباپێ گرێبەستەکەی لەگەڵ یانە پاریسییەکە کۆتایی دێت و پەیوەندی بە یانەی ریال مەدریدەوە دەکات، یاریزانەکە بە سانجێرمانی راگەیاندووە کە بەهیچ شێوەیەک خۆیان ماندوو نەکەن و گرێبەستی نوێی پێشکێش نەکەن، چونکە وەک رۆژنامە ئیسپانییەکە ئاماژەی پێکردووە، کیلیان بڕیاری کۆتایی داوە و دوو هەفتە لەمەوبەر گرێبەستەکەی ریال مەدریدی واژۆکردووە کە بۆ ماوەی پێنج وەرزە، مووچەکەشی لە نێوان 15 بۆ 20 ملیۆن یۆرۆ دەبێت و بەمەش دەبێتە خاوەنی بەرزترین مووچە لەنێو یاریزانانی یانە ئیسپانییەکەدا. 

 

ئێمباپێ لە ساڵی 2018 لە یانەی مۆناکۆوە بەبڕی 180 ملیۆن یۆرۆ پەیوەندی بە پاریس سانجێرمانەوە کرد، لەگەڵ یانە پاریسییەکەدا لە 291 یاریدا بەشداری لە 349 گۆڵدا کردووە.