ڤیدیۆ؛ ئینتەرمەیامی مێسیی بەشێوەیەکی جیاواز ناساند

 

 

هەزاران هاندەر لە ویلایەتی فلۆریدا ئەمریکا، خۆیان بۆ پێشوازیکردن لە لیۆنێل مێسی ئامادەکردووە و چاوەڕوانی ساتی دەستپێکردنی ئاهەنگی یانەکەیان دەکەن بۆ ناساندنی مێسی.

 

بەڵام بارانێکی زۆر و رەشەبایەکی بەهێز، یانەکەی ناچارکرد داوای لێبوردن لە هاندەرانی بکات و رێوڕەسمی ناساندنی مێسی و سێرخیۆ بوسکێس، وەک یاریزانانی نوێی یانەکە دوو کاژێر دواخرا، لەگەڵ ئەمەشدا هاندەران باران و بایە بەهێزەکەیان بەجێنەهێشت و لە چاوەڕوانی مێسی و نەمانی کەشە ناخۆشەکەدا مانەوە.

 

باران و بایە بەهێزەکە وەستان، لیۆنێل مێسی و هاوژین و منداڵەکانی لەنێو پێشوازیی هاندەراندا گەیشتنە یاریگە، ئیدی هەمووان تێگەیشتن کاتی دەستپێکردن نزیکە.

 

ئاهەنگە سەرنجڕاکێشەکەی ئینتەرمەیامی لە یاریگەی DRV PNK دەستیپێکرد، لە شەوێکی مێژووییدا و بە ئامادەبوونی 18 هەزار هاندەر، لیۆنێل مێسی بانگکرا و هاتە نێو یاریگە.

 

لیۆ ناسێنرا، ئەستێرە ئەرجەنتییەکە درێسی ژمارە 10ـی وەرگرت و ئیدی قۆناخێکی نوێ لە خولێکی نوێ و لەگەڵ یانەیەکی نوێ دەستپێدەکات.

 

جگە لە ناساندنی مێسی، سێرخیۆ بوسکێس، یاریزانی ئیسپانیش جارێکی لەگەڵ مێسی دەردەکەوێت و بۆ یەک یانە یارییدەکەن، کاپتنی پێشووی بارسێلۆناش لەنێو هاندەرانی یانەکەدا ناسێنرا و درێسی ژمارە 5ـی وەرگرت.

 

مێسی و بوسکێس دەبنە سەرەتای قۆناخێکی نوێ لە ئینتەرمەیامی و ئیدی هەمووان چاوەڕێن، ئەستێرەکەی تانگۆ سەرکردایەتی گۆڕانکارییەکی گەورەبکات لە یانەکەدا.

 

گرێبەستی مێسی لەگەڵ یانەی ئینتەرمەیامی بۆ ماوەی دوو ساڵە و لە هاوینی 2025 کۆتاییدێت، یاریزانەکە لەو مایەوەدا ساڵانە 50 بۆ 60 ملیۆن یۆرۆ وەک مووچەی ساڵانە وەردەگرێت، دوای وازهێنانیشی لە یارییکردن بەشێکی پشکەکانی یانەکە بە لیۆ دەدرێت.