دوو ئەستێرەی ریال مەدرید دەیانەوێت بچنە سعودیە

 

مانگی تەمموزی رابردوو یانەی ریال مەدرید نوێکردنەوەی گرێبەستی لوکا مۆدریچی یاریزانە کرواتییەکەی راگەیاند، بۆ ئەوەی لەگەڵ تیپی شاهانە بەردەوام بێت تاوەکو دەگاتە تەمەنی 39 ساڵی، بەڵام زۆر لە راپۆرتەکان پشتڕاستی دەکەنەوە کە لوکا دوایین وەرزی لەگەڵ تیپەکەدا دەژی.

 

بەگوێرەی ماڵپەڕی todofichajes یەکێک لەو یاریزانانەی دوای دۆڕاندنە قورسەکەی ئەم دواییەی بەرامبەر بارسێلۆنا لە کلاسیکۆی جامی سوپەری ئیسپانیادا رەخنەی زۆری لێگیرا، لوکاس ڤاسکێزە، کە دوای پێکانەکەی دانی کارڤاخال، ڤاسکێز نەیتوانی ئاستی پێویست پێشکەش بکات.

 

لە راپۆرتەکەدا ئاماژە بەوە کراوە کە یانەی ریال مەدرید کار لەسەر گرێبەستکردن لەگەڵ ترێنت ئەلێکساندەر ئارنۆڵدی ئەستێرەی یانەی لیڤەرپوول دەکات و ئەمە تاکە گرێبەست نابێت بۆ بەهێزکردنی پێگەی بەرگریکاری راست. تەنانەت رۆژنامەی مارکا رایگەیاندووە کە ریال مەدرید و ئارنۆڵد رێککەوتنی کۆتاییان کردووە و تەنیا ماوە لەسەر ئەو رێکبکەون کە ئایا لە زستاندا دەچێتە ریال مەدرید یان لە هاویندا.

 

رۆژنامەکە جەختی لەوە کردووەتەوە کە بەدڵنیایە کە ڤاسکێز لە کۆتایی ئەم وەرزەدا دوای تەواوبوونی ماوەی گرێبەستەکەی، یاریگای سانتیاگۆ بێرنابیۆ بەجێدەهێڵێت و پێدەچێت شوێنی مەبەستی لەنێوان خولی پیشەگەری سعودیە و خولی ئەمریکیدا بێت.

 

ئاماژەی بەوەشکردووە، یاریزانە ئیسپانییەکە دەستەوارەیەکی دارایی گەورەی لە یانەی ئیتیحادی سعودی وەرگرتووە، سەرچاوەکانی نزیک لە یاریزانەکەش پشتڕاستی دەکەنەوە کە پێشتر بڕیاریداوە جارێکی دیکە شانبەشانی کەریم بنزیما یاری بکاتەوە.

 

هەروەها ئەو سەرچاوەیە دەشڵێت "ڤاسکێز تاوەکو کۆتایی ئەم وەرزە رۆیشتنی بەفەرمی راناگەیێنرێت، بەڵام کارگێڕیی ریال مەدرید لە ئێستاوە دەستیکردووە بە بڕیاردانی گرنگ سەبارەت بە وەرزی داهاتوو".

 

لە راپۆرتەکەدا باس لەوەش کراوە کە لوکا مۆدریچ لە بەرامبەردا دەستەوارەیەکی گەورەی لەلایەن یانەی ئیتیحادی سعودییەوە پێگەیشتووە، کە هەوڵدەدات وەرزی داهاتوو ئەو یاریزانە بباتە ریزەکانی.

 

لە راپۆرتەکەدا جەخت لەوەش کراوەتەوە کە بەڕێوەبەری کارەکانی لوکا مۆدریچ سوودی لە سەردانەکەی ئەم دواییەی ریال مەدرید بۆ شاری جددە وەرگرت بۆ دانوستاندن لەسەر گرێبەستە نوێیەکەی، هەروەها دەگووترێت بناخەی پەیوەندیکردن بە خولی سعودیەوە بۆ دانراوە، بەو پێیەی جگە لەو مووچە زەبەلاحە، بوونی بنزیماش لە تیپەکەدا هاندەرێکی زیادە دەبێت بۆ یاریزانە کرواتییەکە.

 

لوکا مۆدریچ لە هاوینی 2012 لە یانەی تۆتێنهامەوە بەبڕی 35 ملیۆن یۆرۆ پەیوەندی بە یانەی ریال مەدریدەوە کرد، کە 13 ساڵە لەگەڵ تیپی شاهانە یاری دەکات.