ڤینیسیۆس داوا دەکات بەشێکی هاندەرانی ئاتلێتیکۆ سزابدرێن

 

 

لە میانی یارییەکانی قۆناخی 16ـی چامپیۆنزلیگ، یانەی ئاتلێتیکۆ مەدرید میوانداری ئینتەر میلانی کرد و بە لێدانە یەکلاکەرەوەکان توانی بۆ قۆناخی چارەکی کۆتایی پاڵەوانێتییەکە سەربکەوێت. 

 

ڤیدیۆیەک لە سۆشیاڵ میدیا بڵاودەبێتە و تێیدا دەردەکەوێت کە پێش دەستپێکردنی یارییەکە، ژمارەیەک لە هاندەرانی ئاتلێتیکۆ مەدرید لە پێش یاریگەی مێترۆپۆلیتانۆ، هوتافی رەگەزپەرستی بەرامبەر ڤینیسیۆس جونیۆر دەڵێنەوە و یاریزانەکە بە 'شامپانزی' بانگدەکەن. 

 

 

ڤیدیۆکە کاردانەوەی زۆری لێکەوتەوە و لای خۆیەوە ڤینیسیۆس لە تۆڕی کۆمەڵایەتی 'ئێکس'، هەژماری هەریەکە لە چامپیۆنزلیگ و یەکێتی تۆپی پێی ئەوروپا تاگدەکات و لەسەر ڤیدیۆکە دەڵێت "هیوادارم بیرتان لە سزادانی ئەوانە کردبێتەوە. ئەوە راستییەکی تاڵە و رووداوێکە کە تەنانەت لەو یارییانەی بەشداریشیان تێدا ناکەم دووبارە دەبێتەوە."

 

لەوەتەی پەیوەندی بە ریال مەدریدەوە کردووە، کێشەی نێوان ڤینیسیۆس و هاندەری تیپەکانی بەرامبەری، میدیاکانی بەخۆیەوە سەرقاڵ کردووە. لە چەند رووداوێکیشدا، گرژیی نێوانیان گەیشتووەتە رادەیەک کە تێیدا ئەستێرە بەرازیلییەکە رووبەڕووی کرداری رەگەزپەرستی بووەتەوە.