بەر لە یاریی ئوردن شەڕ روویداوە و پەنجەیەکی سۆن لەجێچووە

 

وەک ئەو رۆژنامەیە باسی دەکات، شەوی یارییەکەی ئوردن لە کەمپی هەڵبژاردەی کۆریای باشووردا شەڕێکی گەورە لەنێوان یاریزانانی کۆریادا روویداوە و بە بۆکس بەربوونەتە گیانی یەکدی، بووەتە هۆکاری لەجێچوونی پەنجەیەکی دەستی سۆن هیونگ مینی ئەستێرەی یانەی تۆتێنهام.

 

یاریزانانی هەڵبژاردەی کۆریا لە شەوی یارییەکەیاندا بەرامبەر ئوردن لە جامی ئاسیادا، بۆ نانخواردنی ئێوارە کۆبوونەتەوە، بەڵام یاریزانە گەنجەکان بەخێرایی دەستیان لە نانخواردن بەرداوە بۆ ئەوەی بچن یاریی “چالنجی تێنسی سەرمێز” بکەن، ئەمەش سۆنی تووڕە کردووە، چونکە خوانەکەی بە دەرفەتێک دەزانی بۆ بەهێزکردنی پەیوەندییەکانی نێوان یاریزانەکان و لە ئەنجامدا ناکۆکییەک لەنێوان سۆن و لی کانگ دروستبووە و چەند یاریزانێک بە بۆکس لێکیانداوە و ئەو ئەنجامەی لێکەوتووەتەوە.

 

هەندێک سەرچاوە باس لەوە دەکەن کە سۆن لەو شەڕەدا رۆڵی نێوبژیویکاری بینیوە، بەڵام هەر خۆی بووەتە قوربانی، کە لە یارییەکەی تۆتێنهام و برایتن لە گەڕی بیست و چواری پرێمەرلیگدا دەرکەوت دوو پەنجەی بە برینپێچ بەستووە.

 

هەڵبژاردەی کۆریای باشوور بەشێوەیەکی چاوەڕواننەکراو لە قۆناخی پێشکۆتایی جامی ئاسیادا بە دوو گۆڵی بێبەرامبەر بە هەڵبژاردەی ئوردن دۆرا و ماڵئاوایی لە پاڵەوانێتییەکە کرد.

 

لەو یارییەدا هەڵبژاردەی کۆریای باشوور، کە یەکێک بوو لە بەهێزترین بەربژێرانی بردنەوەی نازناوەکە، بەشێوەیەکی خراپ دەرکەوت و ئێستا میدیاکانی ئەو وڵاتە هۆکارەکە بۆ ئەو ناکۆکییە دەگەڕێننەوە کە لەو رۆژەدا لە نێوان سۆن و لی کانگدا روویداوە.