لووتکەی کوردستان لە خولی عێراق بە ئەنجامێکی سپی کۆتاییهات

 

 

لە رکابەرییەکانی گەڕی 16ـی خولی عێراق، یانەی زاخۆ بە ئامادەبوونی هەزاران هاندەر میوانداریی یانەی هەولێری کرد، بەر لە یارییەکە یاریزانانی هەردوولا خولەکێک بۆ گیانی قوربانییانی بوومەلەرزەکەی باکوور و رۆژئاوای کوردستان وەستان، پاشان یارییەکە دەستیپێکرد.

 

لە نیوەی یەکەمدا هەردوولا هەوڵی زۆریاندا بۆ ئەوەی گۆڵ تۆماربکەن، هەولێر زیاتر هێرشی دەبرد و زاخۆش ناوەوە خۆی لە گۆڵی میوانەکەی نزیککردەوە، بەڵام یاریزانانی هەردوولا لە هەژاندنی تۆڕدا سەرکەوتوو نەبوون و نیوەی یەکەم بەبێ گۆڵ کۆتاییهات.

 

لە نیوەی دووەمدا هەردوولا بە ئامانجی تۆمارکردنی گۆڵ و گۆڕینی ئەنجامی یارییەکە گەڕانەوە نێو یاریگە، زاخۆ سوودی لە هاندەرانی وەرنەگرت و هەولێریش ئەو ئاستەی نەبوو کە لە نیوەی یەکەمدا پێشکێشیکرد، بەمەش یارییەکە بەیەکسانبوون بەبێ گۆڵ کۆتاییهات و هەریەکێکیان خاڵێکیان بەدەستهێنا.

 

بەم یەکسانبوونە ژمارەی خاڵەکانی یانەی زاخۆ لە خولەکەدا بوونە 18 خاڵ و چوار یارییە یانەکە نەدۆڕاوە، یانەی هەولێر دوای سێ دۆڕانی لەسەریەک ئەمە یەکەم خاڵە بەدەستیدەهێنێت و ژمارەی خاڵەکانی بووە 14 خاڵ.

 

ئەمە یەکەم یاریی هەولێر بوو دوای دەستلەکارکێشانەوەی غازی فەهد، لە راهێنەرایەتی یانەکە و عەبدولقادر حوسێن، راهێنەری کورد سەرپەرشتی تیپەکەی کرد و خاڵێکی لە زاخۆوە گەڕاندەوە هەولێر.