خولی راهێنەرایەتی ئاسیایی لە هەولێر دەستیپێکرد

 

خولەکە بەسەرپەرشتی رەحیم حەمید، وانەبێژی فیدراسیۆنی تۆپی پێی ئاسیایە، کە وانەکانی 21 رۆژ بەردەوامدەبن. 24 راهێنەر لەسەر ئاستی شارەکانی هەرێمی کوردستان لەگەڵ پارێزگاکانی موسڵ و سەڵاحەدین بەشدارن.

 

بێستون ئەکرەم، سەرۆکی لقی هەولێری فیدراسیۆنی تۆپی پێی عێراق، بە رووداوی راگەیاند "ئەم خولە لەسەر ئاستێکی بەرزە و ئەو کەسانەی بەشدارییانکردووە ئەو راهێنەرانەن کە دوو ساڵ یان زیاتر کارییان لەگەڵ یانەکان کردووە. وانەبێژی خولەکە کەسێکی بە ئەزموونە لەو بوارەدا". 

 

رۆژانە لە هۆڵی بەڕێوەبەرایەتی گشتیی وەرزش و یاریگای فەڕەنسۆ هەریری وانەکانی خولەکە بەشێوازی زارەکی و کردارەکی دەگوترێنەوە، بەشداربووان فێری نوێترین زانستی راهێنان بە تیپ و گرنگیدان بە بەرنامەی خۆراک و راهێنان دەکرێن.

 

دوای تەواوبوونی خولەکە راهێنەرانی بەشدار تاقیکردنەوەیان بۆ دەکرێت و سەرکەوتووان دەبنە خاوەن بڕوانامەی بی ئاسیا.