کوردێک ژمارەیەکی پێوانەیی لە تایکواندۆ تۆماردەکات
رووداو - هەولێر
هێمن مەهدی یاریزانی تایکواندۆی کوردستان ژمارەیەکی پێوانەیی لە بڕگەیەکی یاریی تایکواندۆدا تۆمارکرد و میدالیای زێر لە پاڵەوانیەتی جیهان لە کۆریای باشوور بەدەستهێنا.
ئەم پاڵەوانە تاکە وەرزشوانی کورد بوو بەشداریی لە پاڵەوانیەتییەکەدا کرد، کە لە شاری سیئۆلی کوریای باشوور بە بەشداریی پێنج هەزار و دووسەد یاریزانی شەشت و چوار وڵات بۆ ماوەی هەفتەیەک بەڕێوەچوو.
هێمن مەهدی دوای رکابەرییەکی زۆر لە بڕگەی شکاندن میدالیای زێر و پلەی پێشەنگی بردەوە و بووە خاوەن ژمارەی پێوانەیی بە شکاندنی 12 شتایگەر و لە نێو کۆمەڵێک رکابەری بەهێز پلەی یەکەمی بەدەستهێنا.
لە کاتی گەڕانەوەیدا لە فڕۆکەخانەی نێودەوڵەتی هەولێر مەراسیمێکدا پێشوازیی بۆ ئەو پاڵەوانە رێکخرا.
هێمن مەهدی وەرزشوانێکی ئاستبەرزی یاریی تایکواندۆیە، راهێنەری یانەی قەڵا و هەڵبژاردەی تایکواندۆی هەولێرە، پێشتر لە ریزی هەڵبژاردەی عێراقیشدا یاریی کردووە.
هێمن مەهدی لە گەڕانەوەیدا بۆ رووداو قسەی کرد.