​گواستنەوەی یاریزانان.. مێسی، رامۆس و هاری کەین بەرەو کوێ؟

 

 

داهاتووی لیۆنێل مێسی، سێرخیۆ رامۆس، کەریم بنزیما، هاری کەین و چەندین ئەستێرەی دیکە گرنگییەکی زۆری پێدەدرێت و هێشتا هیچیان بەتەواوی روون نییە کە داهاتوویان لە کوێ دەبێت.

 

 

 

رۆژنامەی سپۆرتی ئیسپانی دەڵێت "یانەی هیلالی سعودی ئامادەکاری دەکات بۆ ئەوەی رۆژی سێشەممە گرێبەستکردنی لەگەڵ لیۆنێل مێسی رابگەیێنێت، بەڵام چەند سەرچاوەیەک ئاماژە بۆ ئەوە دەکەن هەمان رۆژ دەستەی بەڕێوەبردنی لالیگا رەزامەندی لەسەر پلانی بارسا دەدات و یانەکە دەتوانێت گرێبەست لەگەڵ مێسی بکات."

 

 

یانە ریال مەدرید گواستنەوەی هاری کەینی کردووەتە ئامانجی یەکەمی گواستنەوەی ئەم هاوینە و یانەکە چاوەڕێی وەڵامی کەریم بنزیما، ئەستێرەی فەرەنسی دەکات بۆ ئەوەی بڕیاری کۆتایی خۆی بدات، رۆژنامەی ئەی ئێس دەڵێت "تۆتێنهام دەرگای بەڕووی ریال مەدریددا دانەخستووە و یاریزانەکەش دەیەوێت بچێتە ئەو یانەیە."

 

 

ئەمشەو سێرخیۆ رامۆس، ماڵئاوایی لە یانەی پاریس سانجێرمان و هاندەرانی یانەکە دەکات، بەپێی راپۆرتە رۆژنامەڤانییەکان داهاتووی یاریزانەکە لە سعودیە دەبێت، یانەی هیلال و نەسڕ رکابەری لەسەر گواستنەوەی یاریزانەکە دەکەن و چاوەڕواندەکرێت لە چەند رۆژی داهاتوودا لەگەڵ ماڵباتەکەی ئەو یاریزانە بڕیاری کۆتایی بدات.

 

 

یانەی مانچێستەر یونایتدی ئینگلیزی هەنگاوەکانی بەفەرمی بۆ گواستنەوەی مەیسن ماونت، یاریزانی ئینگلیزی و یانەی چێڵسی دەستپێکردووە، کە بە ئەگەری زۆرەوە یاریزانەکە لە یانەکە دەڕوات، بۆ گواستنەوەی یاریزانەکەش رکابەری یانەی لیڤەرپوول دەکات.

 

رۆژنامەی تایمزی بەریتانی دەڵێت "چێڵسی سێ دەستەوارەی بۆ نوێکردنەوەی گرێبەستەکەی پێشکێشی ماونت کردووە، بەڵام یاریزانەکە رەتیکردووەتە لەگەڵ یانەکە بەردەوامبێت."

 

 

یانەی نیوکاسل یونایتدی ئینگلیزی لە گواستنەوەی ئەستێرەیەکی خولی ئەڵمانیا نزیکبووەتەوە و چاوەڕواندەکرێت دۆمینیک سوبۆزلای بباتە ریزەکانی.

 

میدیای بەریتانیا دەڵێت "یاریزانەکە بەرامبەر 70 ملیۆن یۆرۆ لە لایپزیگەوە پەیوەندی بە نیوکاسل یونایتدەوە دەکات و چاوەڕواندەکرێت چەند کاژێری داهاتوو کارەکانی گرێبەستەکە تەواوبکرێن."

 

 

یانەی بایرن میونشنی ئەڵمانی دەیەوێت دەستبەرداری سێرج نابری، یاریزانی ئەڵمانیی یانەکە ببێت، رۆژنامەی بیڵدی ئەڵمانی دەڵێت "چاڤی هێرناندێز سەرسامە بەتواناکانی ئەو یاریزانە و دەیەوێت پەیوەندی بە بارسێلۆناوە بکات."

 

 

یانەی بایرن میونشنی ئەڵمانی بەدوای یاریزانێکدا دەگەڕێت بۆ پڕکردنەوەی شوێنی جۆشوا کیمیچ کە ئەگەری هەیە لە گواستنەوەی هاوینەدا لە یانەکە بڕوات، بۆ ئەوەش چاوی لە تواناکانی هەریەکە لە گرانیت شاکا، یاریزانی یانەی ئارسیناڵ و ماتیۆ کۆڤاچیچ، یاریزانی یانەی چێڵسییە، کە بۆ ئەوەی دوایینیان رکابەری یانەی مانچێستەر سیتی دەکات.