ڤیدیۆ؛ پرایس و ماتیاس یەکەمی رالی داکار بوون
رووداو دیجیتاڵ
تۆبی پرایس و ماتیاس ئێکسترۆم لە قۆناخی کردنەوەی 45ـەمین پیشبڕکێکانی رالی داکار، کە رۆژی شەممە لە سعودیە دەستیپێکرد، پلەی یەکەمیان لە هەردوو پێشبڕکێی ماتۆڕسکیل و ئۆتۆمبێلدا بەدەستهێنا.
لە پێشبڕکێکانی ماتۆڕسکیلدا، تۆبی پرایسی ئوسترالی ئاستێکی بەرزی پێشکێش کرد، دوای ئەوەی لە لایەن دانیال ساندەرزی هاونیشتیمانییەکەیەوە رکابەرییەکی بەهێزی کرا.
پرایس دواجار بە جیاوازی تەنیا یەک چرکە لەگەڵ دانیال سەرکەوتنی بەدەستهێنا و پلەی دووەمی بۆ هاوڕێکەی جێهێشت، پلەی سێیەمیش بۆ رۆس برانچی ماتۆڕسواری بۆتسوانی مایەوە.
لە پێشبڕکێی ئۆتۆمبێلیشدا رکابەرییەکە لەو پەڕی بەهێزیدا بوو، کە ئێکسترۆم بەجیاوازی تەنیا یەک چرکە پێش سێباستیان لۆب کەوت، کە ساڵی رابردوو پلەی دووەمی بەدەستهێنابوو، پلەی سێیەمیش بەر ستیفان پیتەر هانسێل کەوت.