لە شەڕی نێوان دوو گرووپدا لە ئیزمیری تورکیا کەسێک کوژرا و 5ـی دیکەش برینداربوون

 

رووداوەکە کاژێر 12:30 خولەکی ئەمڕۆ دووشەممە، 25ـی ئەیلوولی 2023 روویدا. گرووپێک لە دەرەوە تەقەیان لە گرووپێکی دیکە کرد کە لە چێشتخانەیەکی بەرامبەر دادگە دانیشتبوون. 

 

لە شەڕەکەدا کەسێک گیانی لەدەستدا و پێنجی دیکەش برینداربوون. بریندارەکان گواسترانەوە بۆ نەخۆشخانەکانی دەوروبەر.

 

شایەتحاڵێک بە ناوی گۆکهان یڵدرم گوتی: "من لە دادگا دەرچووبووم، لە نێوان دوو گرووپدا پێکدادان روویدا، زۆر ترساین. بۆ ئەوەی خۆم رزگار بکەم، چوومە ژێر ئۆتۆمبێلێک کە پارکی کردبوو، پێموابوو هێرشێكی تیرۆریستییە. بەداخەوە کەسانێک بریندار بوون."

 

تیمەکانی پۆلیسی ئیزمیر سێ کەسیان دەستبەسەرکرد و لێکۆڵینەوەش لە رووداوەکە دەستپێکردووە.