رێبەری دروزەکان: حکومەتی ئێستای سووریا تووندڕۆیە

 

 

شێخ حیکمەت هەجەری، رێبەری دروزەکانی سووریا ئەو قسانەی لە کۆبوونەوەیەکدا کرد لەگەڵ کەسایەتییە دروزەکان.

 

سەمیر عەزام، رێکخەری کۆمەڵەی سووریی سیکۆلار بە تۆڕی میدیایی رووداوی گوت: رێبەری دروزەکان ئەمڕۆ (پێنجشەممە) ئەو قسانەی کردووە.

 

شێخ حیکمەت هەجەری دەڵێت "حکومەتی ئێستای سووریا حکومەتێکی تووندڕۆیە و حکومەتی سووریا لەلایەن دادگەی نێودەوڵەتییەوە داوا دەکرێت."

 

رێبەری دروزەکان ئاماژەی بەوەشکرد، "ئێمە هیچ رێککەوتنێکمان لەگەڵ شام نەکردووە و ئێمە لە بوون و نەبووندا دەژین، چی بۆ دروزەکان باشە ئەوە دەکەین."

 

رۆژی 9-3-2025، لەبارەی رووداو و شەڕە نێوخۆییەکەی سووریاوە، شێخ حیکمەت هەجەری، سەرکردەی رۆحیی دروزەکان داوایکرد کۆتایی بە تووندوتیژی بهێنرێت.  

 

ئەو لە راگەیێندراوێکدا گوتی، "ئەو ئاگرەی بە درووشمی تایفی هەڵگیرساوە، هەموو سووریا و خەڵکەکەی دەسووتێنێت."

 

دروزەکان نزیکەی 4٪ـی دانیشتووانی سووریا پێکدەهێنن و پارێزگای سوەیدا چەقی ناوچەکەیانە. ئەوان موسڵمانن و خاوەن مەزهەبێکی تایبەتی خۆیانن کە بە تائیفەی موەحدین ناسراون.