چیرۆکی ئەو منداڵەی لە ساڵڕۆژی لەدایکبوونیدا لە رووداوەکەی حەمدانیە گیانی لەدەستدا

 

عیمران، پرسەی بۆ کوڕەکەی داناوە و چاوەڕوانە جەنازەی هاوژینەکەشی وەربگرێتەوە. لە خێزانەکەیدا تەنیا ئەو و کچ و کوڕێکی رزگاریان بووە کەرەمی کوڕیشی لەجیاتی ئاهەنگی لەدایکبوون، پرسەی بۆ دانرا.

 

حەنینی دایکی کەرەم تەمەنی 27 ساڵ بوو، لە ئاهەنگەکەی شەوی 26ـی ئەیلوولی 2023 لە حەمدانیە، گیانی لەدەستدا و تائێستاش تەرمەکەی نەناسراوەتەوە، ئەمەش خەم و کۆژانەکانی هاوژینەکەی هێندەی دیکە زیاتر کردووە.

 

عیمران بەهنام، باوکی کەرەم باسی شەوی کارەساتەکە بۆ رووداو دەکات و دەڵێ "خەڵک هەمووی رایدەکرد، هەریەکە پاڵی بەوی دیکەدا دەنا، ئێمە کەوتینە سەر زەوی، کارەبا پچڕا و هۆڵەکە هەمووی ئاگر و دووکەڵ بوو، بۆیە من هاوژینەکەمم ونکرد.''

 

باوکی حەنین، سێ رۆژە نەوەکەی خۆی لە ئامێز گرتووە و ناهێڵێت لێی دووربکەوێتەوە، دەڵێ 'بۆنی دایکی لێ دێت.'

 

کەسوکاری قوربانییان لە دەسەڵاتدارانی ناوچەکە توڕەن و دەخوازن چارنووسی ئەوانەی ماون و هێشتا تەرمەکانیان نەناسراوەتەوە، ئاشکرا بکرێت.

 

سەعد یەشووع، باوکی حەنین دەڵێ "من دەمەوێت ئارام بم، دایک و خوشکی حەنین هەر دەگرێن. من کچەکەی خۆم دەوێت، دەمەوێت ئارام بم و بەس بێت. ئەوەی ئێمە بینیمان، رۆژانە ئەم سەختیانەی دەبینین، کۆتاییان بێت. بۆ خاتری خوا بهێڵن خەڵک بژیت!"

 

38 تەرم هێشتا لە دادپزیشکیی موسڵ ماون و پشکنینی DNAـیان بۆ دەکرێت و چاوەڕوانن ئەنجامەکانیان دەربچێت.

 

د. شەهد عارف، بەڕێوەبەری بەشی داد پزیشکیی موسڵ لەمبارەیەوە بە رووداوی گوت "تیمی وەزاری لە بەشی دادپزیشکی لە بە‌غدا، نموونەی وەرگرتووە و ئێستا ئەو نموونانە لە بەغدان و کاریان لەسەر دەکرێت، لە چەند رۆژی داهاتوودا ئەنجامەکان دەردەکەون و رادەگەیێنرێن."

 

هەتاوەکو ئێستا 72 تەرمی رووداوەکەی حەمدانیە لە گۆڕستانی قیامە لە حەمدانیە نێژراون، ئەوانە و چەندین قوربانیی دیکەش کە ژمارەیان زیاتر لە 100 کەسە، لە رووداوی گڕگرتنی هۆڵی هەیسەم، گیانیان لەدەستدا.