قاسم ئەعرەجی، راوێژکاری ئاسایشی نیشتمانیی عێراق.
رووداو دیجیتاڵ
راوێژکاری ئاسایشی نیشتمانیی عێراق پێیوایە سەردانەکەی سەرۆکی حکومەتی هەرێمی کوردستان، بەرهەمدار و ئەرێنییە و دەشڵێت: "چاوەڕێی سەردانی فەخامەتی سەرۆک مەسعود بارزانین."
دوای کۆبوونەوەی لەگەڵ مەسرور بارزانی، سەرۆکی حکومەتی هەرێمی کوردستان؛ قاسم ئەعرەجی، راوێژکاری ئاسایشی نیشتمانیی عێراق، هەڵسەنگاندنی بۆ دیدارەکە کرد: "دیدارێکی دۆستانە بوو، دیداری برایانەی رۆڵەی نیشتمانێک بوو."
باسی لەوەشکرد کە دیداری لێکتێگەیشتنی بەغدا و هەولێر، هێز و گوڕوتینێکی زیاتر بە عێراقی یەکگرتووی فیدراڵی سەربەخۆ دەبەخشێت. دەرەنجام، خاڵی هاوبەشی نێوانمان زۆرن، پێکەوە کار دەکەین بۆ پێدانی هەموو شایستەیەک بەپێی دەستوور و یاساکان؛ "پێموایە کەشەکە زۆر گونجاوە بۆ ئەم جۆرە گفتوگۆیانە."
لەبارەی کۆبوونەوەی لەگەڵ محەممەد شیاع سوودانی، سەرۆکوەزیرانی عێراق؛ قاسم ئەعرەجی بە پەیامنێری رووداوی گوت: "زۆر بەرهەمدار و ئەرێنی دەبێت. دیداری ئێمەش زۆر ئەرێنی بوو. پەنا بەخوا، عێراق هەمیشە سەرکەوتوو و یەکگرتوو و بەهێز و پابەند بە دەستوور دەبێت، لەژێر چەتری نیشتمانێکی بەهێز و ئارام."
لە وەڵامی پرسیارێکی دیکەی پەیامنێری رووداو سەبارەت بە بەردەوامی سەردانەکان گوتی: "بەدڵنیاییەوە ئەم سەردانانە بەردەوام دەبن و چاوەڕێی سەردانی فەخامەتی سەرۆک مەسعود بارزانیش دەکەین. بەرەوپێشچونی زۆر و پەیوەندییەکی بەهێز و فراوان لەنێوانماندا هەیە. پێموایە ئەمە قیبلەنمای سەرەکییە بۆ چارەسەرکردنی هەموو کێشەکان بەپێی دەستوور."
پێشنیوەڕۆی ئەمڕۆ سەرۆکی حکومەتی هەرێمی کوردستان گەیشتە بەغدا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ