قاسم ئەعرەجی: 2629 خێزانی عێراقی لە کەمپی هۆڵ گەڕێندراونەتەوە

 

قاسم ئەعرەجی، راوێژکاری ئاسایشی نیشتمانیی عێراق رایگەیاند، لە ساڵی 2021وە تاوەکو ئێستا 2629 خێزانی عێراقییان لە کەمپی هۆڵ گەڕاندووەتەوە، کە زیاتر لە 10 هەزار کەس دەبن.

 

کەمپی هۆل دەکەوێتە پارێزگای حەسەکەى رۆژئاواى کوردستان و لەژێر دەسەڵاتى هێزەکانى سووریاى دیموکرات (هەسەدە)ـدایە. بەشێکی زۆری دانیشتووانی کەمپەکە ژن و منداڵی چەکدارانی پێشووی داعشن. 

 

عەلی عەباس، گوتەبێژی وەزارەتی کۆچ و کۆچبەرانی عێراق رۆژی پێنجشەممە 24-10-2024 بە تۆڕی میدیایی رووداوی راگەیاند، پرۆسەی گەڕاندنەوەی عێراقییەکانی کەمپی هۆل بەردەوامە، تاوەکو ئێستا نزیکەی 10 هەزار کەسیان لە کەمپی هۆلەوە گەڕاندووەتەوە و نزیکەی 18 هەزاری دیکەش هێشتا لە کەمپەکەدا ماون.

 

گوتەبێژی وەزارەتی کۆچ و کۆچبەرانی عێراق گوتی، ئەو خێزانە عێراقییانەی لە کەمپی هۆل-ەوە دەگەڕێندرێنەوە، دەبرێنە کەمپی جەدعە لە سنووری شارۆچکەی گەیارە لە پارێزگای نەینەوا. کەمپەکە ساڵی 2021 بۆ وەرگرتنی کەسوکاری چەکدارانی داعشی عێراقی دروستکرا.

 

بەگوتەی قاسم ئەعرەجی، دوو هەزار خێزانیان گەڕاندووەتە زێدی رەسەنی خۆیان و نزیکەی 600 خێزانیان ماوە، ئێستا لە بەرنامە شیاندنەوەدان.

 

ئەعرەجی ئەو قسانەی لە کۆنگرەی هەڵسەنگاندن و نوێکردنەوەی ستراتیژیەتی عێراقی بۆ بەرەنگاربوونەوەی تیرۆر بۆ ساڵانی (2012-2025) لە بەغدا کرد، کە دەزگەی دژە تیرۆری عێراق بە هاوکاری نێردەی یەکێتیی ئەورووپا لە عێراق رێکیخستبوو.

 

شکستەکانی رێکخراوی داعش، بەتایبەتی لە ساڵی 2017 لە عێراق و دواتریش لە سووریا، رێکخراوەکەی بەرەو لاوازی برد. 

بەشێکی زۆری سەرکردەکانیان کوژران و بەشێکی زیاتری ئەندامەکانیشیان لە لایەن هێزە ئەمنییەکانەوە دەستگیرکران.