هۆشیار زێباری: سەیرانگەکەی زاخۆ بە تۆپى 155 ملیم تۆپبارانکراوە

 

هۆشیار زێبارى کە لەنێوان ساڵانى 2006 بۆ 2010 وەزیرى دەرەوەى عێراق بوو، 21ـى تەممووزى 2022، لە تویتێکدا نووسیویەتی: "ئەوەى بەرپرسانى تورکیا لەبارەى بەئامانجگرتنى شوێنێکى گەشتیاریى مەدەنى لە زاخۆ تێیناگەن ئەوەیە کە سەرجەم شەهیدەکانى عەرەبی عێراقین و لە باشوورى عێراقەوە بەمەبەستى گەشتکردن روویان لە دوورترین خاڵى وڵاتەکەیان کردووە و بە تۆپى 155 ملیم و لەناو خاکى تورکیاوە تۆپبارانکراون."

 

هۆشیار زێبارى پێشنیاز دەکات لیژنەیەکى لیکۆڵینەوەى هاوبەش لەنێوان عێراق، تورکیا و هەرێمى کوردستان پێکبهێندرێت لەبارەى ئەو رووداوە.

 

20ـى تەممووز ناوچەیەکى گەشتیارى لە گوندی پەرەخ لە سنوورى شارى زاخۆ تۆپبارانکرا و بەهۆیەوە نۆ گەشتیارى عەرەبى شارەکانى ناوەڕاست و باشوورى عێراق گیانیان لەدەستدا و 23 گەشتیارى دیکەش برینداربوون.

 

حکومەتى عێراقى تورکیاى تۆمەتبارکرد بە ئەنجامدانى ئەو بۆردوومانە و لەبەرامبەردا تورکیا رەتیکردەوە کە ئەو تۆپبارانەکەی ئەنجامدابێت. 

چەند زانیارییەک لەبارەی تۆپی 155 ملیمی:

- تۆپەکە تایبەتە بە هێزە وشکانییەکانی سوپای تورکیا و لەلایەن کۆمپانیای MKEKـەوە دروستکراوە. 

- ئەو سیستمە دەتوانێت تۆپەکە تاوەکو دووری 40 کیلۆمەتر بهاوێژێت بەپێی جۆری تۆپەکە دەگۆڕێت.

- ئەو ئۆتۆمبێلەی سیستمەکەی لەسەر جێگیرکراوە دەتوانێت بەخێرایی تاوەکو 20 کیلۆمەتر لە کاژێرێکدا بڕوات.

- بۆ یەکەمجار لە ساڵی 1990 دروستکراوە و دراوە بە سوپای تورکیا. 

- تورکیا لە ساڵی 2012 رایگەیاند، 225 ئۆتۆمبێلیان هەیە کە سیستمەکەی لەسەربێت و پلانیان ئەوەیە بیکەنە 400. 

- جگە لە تورکیا سوپای پاکستانیش لەو جۆرە تۆپە بەکاردەهێنێت بۆ سوپاکەی.