محەممەد شیاع سوودانی دەچێتە ئەمریکا

نووسینگەی راگەیاندنی محەممەد شیاع سوودانی، سەرۆکوەزیرانی عێراق بڵاویکردەوە، رۆژی شەممە محەممەد شیاع سوودانی بە سەرۆکایەتیی شاندێک بەرەو نیویۆرک بەڕێ دەکەوێت، "بە مەبەستی بەشداریکردن لە 79یەمین کۆبوونەوەکانی کۆمەڵەی گشتیی نەتەوە یەکگرتووەکان". 

 

بە گوێرەی راگەیێندراوەکە، سوودانی لە کۆبوونەوەی کۆمەڵەی گشتیی نەتەوە یەکگرتووەکاندا گوتاری عێراق پێشکێش دەکات و هەر لە نیویۆرک دیدار و کۆبوونەوەی لەگەڵ چەندین سەرکردە و سەرۆکی وڵاتان دەبێت کە بەهێزکردنی هاوئاهەنگییەکان، رووبەڕووبوونەوەی ئاڵنگارییەکان و پێداگری لە پابەندییەکان جەختیان لێ دەکرێتەوە. 

 

نووسینگەی راگەیاندنی سوودانی دەڵێت، سەرۆکوەزیرانی عێراق هەر لە میانی سەردانەکەیدا زنجیرەیەک دیداری لەگەڵ سەرۆک و سەرکردەکانی وڵاتانی دۆست و سەرۆکی شاندە بەشداربووەکان دەبێت و دیداری دوو قۆڵیشی لەگەڵ سکرتێری گشتیی نەتەوە یەکگرتووەکان و ژمارەیەک بەرپرس و نێردەی شاند و رێکخراوە نێودەوڵەتییەکان دەبێت. 

 

لە رۆژانی 22 و 23ی ئەم مانگەدا سەرکردەی وڵاتەکان لە بارەگای سەرەکی نەتەوە یەکگرتووەکان دەبن و لەبارەی ئەو بابەتانە قسە دەکەن کە پەیوەندییان بە وڵاتەکانیان، ناوچەکانیان و کۆمەڵگەی نێودەوڵەتییەوە هەیە.