سوودانی دوای سەردانەکەی بۆ موسڵ یەکەم بڕیاری دا

 

 

محەممەد شیاع سوودانی، سەرۆکوەزیرانی عێراق رۆژی دووشەممە 15-05-2023 بڕیاریدا بە دروستکردنەوەی نووسینگەی جێبەجێکردنی ئاوەدانکردنەوەی موسڵ پێکهاتووە لە: راوێژکاری سەرۆکوەزیرانی عێراق بۆ کاروباری تەکنیکی، وەکو سەرۆکی لیژنە؛ پارێزگاری نەینەوا، بریکاری وەزارەتی دارایی، بریکاری وەزارەتی پلادانان و سەرۆکی زانکۆی موسڵ وەکو ئەندام و عەبدولقادر دەخیل، بەڕێوەبەری جێبەجێکار و بڕیاردەر. 

بڕیارەکەش لە رۆژی سێشەممە 16-05-2023وە کەوتووەتە واری جێبەجێکردنەوە.

 

ئەمین فەنەش، قایمقامی موسڵ لە ناوەندی پارێزگای نەینەوا هەواڵەکەی بۆ تۆڕی میدیایی رووداو پشتڕاست کردەوە و رایگەیاند، ئەمە گرنگیدانی سەرۆکوەزیرانی عێراق بە موسڵ دووپاتدەکاتەوە، لە سەردانەکەیدا بەڵێنی دا لە نزیکەوە بەدواداچوون بۆ دۆخی موسڵ بکات بۆ ئاوەدانکردنەوەی. ئاماژەی بەوەش کرد، پێویستە مانگانە راپۆرت لەبارەی دۆخ و ئاوەدانکردنەوەی موسڵ بدرێتە سەرۆکوەزیران.

 

محەممەد شیاع سوودانی، سەرۆکوەزیرانی عێراق رۆژی هەینیی رابردوو سەردانی موسڵی کرد و سەردانەکەی دوو رۆژی خایاند، لەگەڵ گەورە بەرپرسانی پارێزگاکە کۆبووەوە و چەندین پرۆژەی نوێی کردەوە و بەسەرکردەوە.

 

مانگی ئاداری 2021 مستەفا کازمی، سەرۆکوەزیرانی ئەوکاتەی عێراق بە سەرۆکایەتیی خۆی بڕیاری پێکهێنانی لیژنەی باڵای ئاوەدانکردنەوەی موسڵی دا.