پۆلیسی دیالە: لە شارەبان پۆلیسێک بە قەنناسی داعش کوژرا

 

رۆژی 10ى کانوونى دووەمى 2023، عەمید نیهاد محەممەد، گوتەبێژى بەڕێوەبەرایەتیی پۆلیسی دیالە بە تۆڕى میدیایی رووداوى راگەیاند: "شەوى رابردوو لە سنوورى قەزاى شارەبان پۆلیسێکى بەڕێوەبەرایەتیی پۆلیسی دیالە لەلایەن چەکدارانى داعشەوە بە قەنناس تەقەى لێکراوە و کوژراوە."

 

گوتەبێژى بەڕێوەبەرایەتیی پۆلیسی دیالە ئاماژە بەوە دەدات کە پۆلیسەکە خەڵکى دیالە بووە و دواى رووداوەکە فەرماندەى پۆلیسی دیالە و هێزێک چوونەتە ئەو شوێنەى کە تەقەکەى لێکراوە "بەمەبەستى راوەدوونانى ئەو چەکدارانە."

 

بەگوێرەى راگەیێندراوی پۆلیسى دیالە، لەبارەى ئەو روداوەوە کە ئاڕاستەى وەزارەتى ناوخۆى عێراقى کردووە و دەست تۆڕى میدیایی رووداو کەوتووە "ئەو پۆلیسە کاژێر 11:40 خولەک کوژراوە و هێرشەکە لەلایەن ژمارەک چەکدارى داعشەوە ئەنجامدراوە لەدژى خاڵێکى چاودێریی پۆلیس لە گوندى بینکانی سنوورى شارەبان."

 

پۆلیسە کوژراوەکە ناوى حەسەن ئەحمەد جەبارەیە و تەمەنى 53 ساڵە.