دژەتیرۆری عێراق: چەكدارانی داعش لە ناوچەكانی نێوان هێزەكانی سوپا و پێشمەرگەدان

 

 

فەریق روكن عەبدولوەهاب ساعدی، سەرۆكی دەزگای دژەتیرۆری عێراق رایگەیاند، داعش چەند ناوچەیەك لە عێراق بۆ جێبەجێكردنی هێرشەكانی بەكاردەهێنێت، بەتایبەتی دۆڵ و زنجیرە چیاكان لە پشتێنەی بەغدا، دیالە و كەركووك، سەرەڕای ناوچەكانی نێوان هێزەكانی سوپا و پێشمەرگە و هەندێك ناوچەی سنووری خانەقین.

 

لەبارەی هەوڵەكانی بەرەنگاربوونەوەی داعش، ساعدی ئاماژەی بەوە دا، "دەزگای دژەتیرۆر ستراتیژێكی نوێی دژی تیرۆر هەیە كە قەدەخەكردن و خۆپارێزی لەخۆدەگرێت، بۆ بەرەنگاربوونەوەی تیرۆر پێویستیشمان بە هاوكاریی سەرجەم دامەزراوەكانی دەوڵەتە. مانگی رابردوویش 23 چەكداری داعش لە عێراق دەستگیركراون".

 

هەرچەندە لە 9ی كانوونی یەكەمی 2017 حەیدەر عەبادی، سەرۆكوەزیرانی ئەو كاتی عێراق سەركەوتنی بەسەر داعشدا راگەیاند، بەڵام تاوەكو ئێستاش چەكدارانی داعش بەشێوەی پەرتەوازە لە دەوروبەری بەغدا، نەینەوا، سەلاحەدین، ئەنبار، بەشێكی پارێزگای دیالە و كەركووك جموجووڵیان هەیە و ناوبەناو هاووڵاتییانی سڤیل و هێزە ئەمنییەكان دەكەنە ئامانج.