ئەمریکا هانی سەرکردە عێراقییەکان دەدات بۆ دەستپێکردنی 'دیالۆگێکی بنیاتنەرانە'

 

 

رۆژی دووشەممە 3ـی تشرینی یەکەمی 2022، ئەنتۆنی بلینکن، وەزیری دەرەوەی ئەمریکا بەبۆنەی رۆژی نیشتمانیی عێراقەوە لە راگەیێندراوێکدا پیرۆزبایی لە گەلی عێراق کرد و گوتی، "جێگەی خۆشحاڵی بێوێنەمە کە بەناوی حکومەتی ویلایەتە یەکگرتووەکانی ئەمریکاوە پیرۆزبایی لە خەڵکی عێراق بکەم بەبۆنەی رۆژی نیشتمانییانەوە."

 

ئاماژەی بەوەش کرد، "ئەمڕۆ رۆژێکە بۆ بەبیرهێنانەوە و شانازیکردن بە دەستکەوتەکانی عێراق و خۆڕاگری خەڵکەکەیەوە. لە ماوەی 90 ساڵدا عێراق لە دۆخێکی زۆر ناهەمواردا جەنگاوە بۆ برەودان بە کۆمەڵگەیەکی گشتگیر و یەکسان بۆ هاونیشتمانییەکانی و هەروەها بۆ نەوەکانی داهاتووی عێراقییەکان."

 

لەبارەی بنبەستی سیاسیی عێراق، ئەنتۆنی بلینکن گوتی، "لەم رۆژە نیشتمانییەدا، هانی سەرکردە عێراقیەکان دەدەین بۆ دەستپێکردنی دیالۆگێکی بنیاتنەر و گشتگیر بۆ زاڵبوون بەسەر بنبەستی پرۆسەی سیاسی و کارکردن بە ئاراستەی باشکردنی ژیانی عێراقییەکان."

 

وەزیری دەرەوەی ئەمریکا باس لە پەیوەندییەکانی وڵاتەکەی لەگەڵ عێراق دەکات و گوتی، "ویلایەتە یەکگرتووەکانی ئەمریکا بە قوڵی پابەند دەمێنێتەوە بە هاوبەشی ستراتیژی خۆی لەگەڵ عێراق و هەروەها قوڵکردنەوە و بەهێزکردنی پەیوەندییەکانمان لەگەڵ عێراقدا لە ژێر رۆشنایی رێککەوتننامەی چوارچێوەی ستراتیژی نێوان ویلایەتە یەکگرتووەکان و عێراقدا."

 

ئەنتۆنی بلینکن راشیگەیاندووە، "بە هیوای بەردەوامی کارکردنمان بەیەکەوە لەسەر کارە لە پێشینە هاوبەشەکانمان و پەرەپێدانی پەیوەندی نێوان گەلەکانمان. باشترین هیوا و خۆشگوزەرانی بۆ خەڵکی عێراق دەخوازم لە ساڵی داهاتوودا."