فەرماندەى پاسەوانى سنوورى عێراق: بستێکی سنوورەکەمان لەگەڵ سووریا نەماوە، کە بە کامێرا چاودێریی نەکرێت

 

ئەمڕۆ (دووشەممە، 2ـی کانوونى یەکەمى 2024) گوتەبێژى وەزارەتى ناوخۆى عێراق و فەرماندەى هێزى پاسەوانى سنوور، کۆنگرەیەکى رۆژنامەڤانییان لە بەغدا ئەنجام دا بۆ روونکردنەوەى ئاستى پاراستنى سنوورى عێراق لەگەڵ سووریا.

 

میقداد میرى، گوتەبێژى وەزارەتى ناوخۆى عێراق رایگەیاند: ئەوەى بۆ پاراستنی سنوور کراوە، بەرهەمى کارى ئەمڕۆ نییە و لە پێکهێنانى ئەم حکومەتەوە کارى لەسەر کراوە.

 

میقداد میرى دەڵی "ئەوەى وەک تۆکمەکردنى سنوورى عێراق کراوە، یەکەمجارە لە مێژووى دروستکردنى سنوورى دەوڵەتى عێراق دا بکرێت. عێراق سێ هەزار و 716 کیلۆمەتر سنوورى لەگەڵ وڵاتانى دراوسێ هەیە، کە سنوورى سووریا لە هەموویان باشتر پارێزراوە." 

 

سنوورى نێوان عێراق و سووریا زیاتر لە 650 کیلۆمەترە، تاوەکو ئێستا زیاتر لە 80%ـی سنوورەکە بە بەربەستى کۆنکرێتى، گیراوە.

 

فەریق محەممەد عەبدولوەهاب ساعیدی، فەرماندەى هێزى پاسەوانى سنوورى عێراق لەو  کۆنگرە رۆژنامەڤانییەدا رایگەیاند: لە رێگەى سیستمێکى چاودێریی زیرەک و کامێراى گەرمبین 24 کاژێر هەموو ئەو سنوورە بەتەواوى کۆنترۆڵکراوە.

 

لە 27ـی تشرینى دووەمی 2024ـەوە، چەکدارانى دەستەى تەحریر شام چەند ناوچەیەکى سووریایان کۆنترۆڵکرد، شەڕ و ئاڵۆزى لەو وڵاتە عێراقى ناچار کردووە رێوشوێنەکانى لە سنوورى لەگەڵ سووریا، تووندتر بکات. 

 

فەرماندەى هێزى پاسەوانى سنوورى عێراق گوتى "کامێراکانى چاودێرى لەسەر سنوور، دیمەنەکان دەگوێزنەوە بۆ بارەگاى ناوچەکە و بەغدا، دیمەنى بەشێک لە نێو قووڵایی سووریا و عێراقیش تۆمار دەکات، بستێک زەوى لەو سنوورە نییە کە بە کامێرا چاودێرى نەکرێت، ئێستا پاراستنى سنوور بەساڵى 2014 بەراورد ناکرێت."