گرووپێکی هاککەر دیمەنی ئەشکەنجەدانی گیراوانی نێو گرتووخانەیەکی تاران بڵاو دەکەنەوە
رووداو دیجیتاڵ
گرووپێکی هاککەری ئێران بەناوی گرووپی "دادپەروەریی عەلی"، بە بڵاوکردنەوەی چەند گرتەڤیدیۆیەکی نێو گرتووخانەی ئێڤینی تاران رایانگەیاند، هەموو کامێراکانی ئەو گرتووخانەیان هاککردووە و توانیویانە لە رێگەی کامێراکانی گرتووخانەکەوە دەستیان بە هەندێک دیمەنی ئازاردان و ئەشکەنجەدانیی دەستگیرکراوانی نێو گرتووخانەکە بگات.
گرووپەکە لە راگەیێندراوێکدا نووسیویەتی، گرتووخانەی ئێڤینی تاران هۆکاری دانانی ئیبراهیم رەئیسی بە سەرۆککۆماری ئێران لە لایەن عەلی خامنەیی، رێبەری باڵای وڵاتەوە بووە و دەشڵێت، بە بڵاوکردنەوەی ئەم گرتە ڤیدیۆیە رایدەگەیێنین: "درێژە بە ناڕەزایەتییەکانمان دەدەین و چەوساندنەوەی خەڵک لە لایەن حکومەتەوە بڵاودەکەینەوە".
گرووپەکە دەشڵێت: "ئاگاداری سەرکوتکردنی خەڵکین لە لایەن حکومەتەوە و رێگە بە شاردنەوەی ئەو راستییە نادەین".
گرووپی "دادوەریی عەلی" راشیگەیاندووە، چەندین ڤیدیۆی دیکەی لە ئازاردان و ئەشکەنجەدانی زیندانییانی سیاسی لە گرتووخانەی ئێڤین لەبەردەستە کە لە رێگەی هاککردنەوە دەستیکەوتوون و بڵاویان دەکاتەوە.
وەک لە ڤیدیۆکەدا هاتووە، لەسەر شاشەی کۆمپیوتەری نێو گرتووخانەی ئێڤین لۆگۆی گرووپەکە دەبیندرێت و لە دیمەنەکەشدا دیارە بەرپرسانی ئایتی گرتووخانەکە سەیری لۆگۆی گرووپەکە دەکەن و هەوڵدەدەن کۆتایی بە هاککردنەکە بهێنن.