ئەلبانیا پەیوەندییە دیپلۆماسییەکانی لەگەڵ ئێران راگرت و دیپلۆماتەکانی ئەو وڵاتە دەردەکات

 

 

حکومەتی ئەلبانیا ئەمڕۆ چوارشەممە، 7ی ئەیلوولی 2022 لە تیرانای پایتەختی ئەو وڵاتە باڵیۆزخانەی ئێرانی ئاگادار کردووەتەوە، وەکو دژ کردەوە بە هێرشی ئەلکترۆنیی سەر دامەزراوە حکومی و ئیدارییەکانی ئەو وڵاتە، تەواوی پەیوەندییە دیپلۆماسییەکانی لەگەڵ ئێران رادەگرێت و دیپلۆماتکارانی ئێرانی لە وڵاتەکەی دەردەکات.

 

بەپێی هەواڵەکە، ماوەیەک پێش ئێستا هێرشی ئەلکترۆنی کراوەتەسەر دامەزراوە حکومی و ئیدارییەکانی ئەلبانیا و لە لێکۆڵینەوەکاندا دەرکەوتووە، ئێران لەپشت هێرشە ئەلکترۆنییەکەوە بووە.

 

ئاژانسی رۆیتەرز لە زاری ئەدی راما، سەرۆکوەزیرانی ئەلبانیاوە بڵاویکردووەتەوە، 24 کاژێر دەرفەتیان داوەتە تەواوی دیپلۆماتکار و فەرمانبەرانی باڵیۆزخانەی ئێران، خاکی ئەو وڵاتە جێبهێڵن.

 

تاوەکو ئێستا وەزارەتی دەرەوەی ئێران کاردانەوەی بەو بڕیارەی ئەلبانیا نەبووە، بەڵام ئاژانسی فەرمیی حکومەتی ئێران هەواڵەکەی بڵاوکردووەتەوە و دەڵێت، ئەلبانیا رێگەیداوە رێکخراوی موجاهیدینی خەلقی ئێران لە خاکی ئەو وڵاتەوە دژ بە ئێران چالاکی بکات.

 

لە ساڵی 2016وە بنکەی سەرەکیی رێکخراوی موجاهیدینی خەلقی ئێران لە عێراقەوە گواستراوەتەوە بۆ ئەلبانیا و نزیکەی دوو هەزار ئەندامی موجاهیدین لەو وڵاتە نیشتەجێن. لەو کاتەوە پەیوەندییەکانی نێوان ئێران و ئەلبانیا گرژیی تێکەوتووە.

 

پێشتر ئێران لە شەڕی کۆسۆڤۆ و بۆسنە لە دەیەی 90ی زایینی پشتگیریی لە ئەلبانیا کردبوو، بەڵام دوای ئەوەی ئەلبانیا بە فەرمی دانی بە ئیسرائیلدا نا و لە بەرەی رۆژئاوا دژی ئێران وەستا، پەیوەندییەکانی ئەو دوو وڵاتە سارد بووەوە. ئەلبانیا ساڵی 2018 ئێرانی بە هەوڵدان بە هێرشی تیرۆریستی لەو وڵاتە تۆمەتبار کرد و باڵیۆزی ئەو وڵاتەی دەرکرد، بەڵام ئێران رەتیکردەوە و رایگەیاند، لەژێر گوشاری ئەمریکا و ئیسرائیل بە ناڕاست تۆمەتباری کردووە.