ئەمڕۆ ئێران پیتاندنی یۆرانیۆم بەرزدەکاتەوە

 

عەلی ئەکبەر ساڵحی، سەرۆکی ئاژانسی وزەی ئەتۆمی ئێران رایگەیاند "ئاستی پیتاندنی یۆرانیۆم دەگەیێنینە 5%، بەڵام  دەتوانین تاوەکو ئاستی لە 20% بەرزیبکەینەوە".

 

زیادکردنی پیتاندنی یۆرانیۆم لەرێگەی بە زیادکردنی غازە لە هەزار و 44 ئامێری جیاکەرەوەی یۆرانیۆم.

 

هەنگاوەکەی ئێران، رۆژئاواییەکانی نیگەران کردووە، دۆمینیک راب، وەزیری دەرەوەی بەریتانیا رایگەیاند، رەفتارەکانی ئەمدواییەی ئێران بەڕوونی دژ بە رێککەوتنە ئەتۆمییەکەن و هەڕەشەش بۆسەر ئاسایشی نەتەوەیمان پێکدەهێنن.

 

دانیشتووانی تاران دەڵێن ئەو هەنگاوە کاریگەری لەسەر ئابووری ئێران دەبێت، محەممەد دانیشتوویەکی تارانە و دەڵێت، "کاریگەری خۆی دەبێت، چونکە هەر کاتێك بەریەککەوتن زیاتر ببێت بێگومان کاریگەرییەکان زۆرتر دەبن، ئێستا هەرچۆنێک بێت بازاڕ لە ئاستێکدا جێگیربووە، من ناڵێم زۆر باشە، بەڵام بەگشتی بازاڕ لەئاستێکدا جێگیربووە و ئەمجۆرە بەریەککەوتانە دەبنەهۆی ئەوەی گرانی جارێكی دیکە روومانتێبکات".

 

عەلی محەمەدی، دانیشتوویەکی دیکەی تارانە دەڵێت، "تاوەکو ئەو کاتەی ئێمە لەگەڵ وڵاتانی زلهێزی وەک ئەمریکا، ئەوروپا و هەروەها وڵاتانی دیکەی جیهان، تەنانەت سعودییەش کە وڵاتێكی دەوڵەمەندە و لەڕووی پارەوە بە‌هێزە، تاوەکو ئەو کاتەی کە ئێمە لەگەڵ ئەو وڵاتانەی ئاشتی نەکەین و پەیوەندی باشمان نەبێت، ئەوا رێککەوتنی ئەتۆمی هیچ واتا و بەهایەکی نییە و بەڕێز رووحانیش سەدان رێککەوتنی دیکەش ئەنجامبدات هیچ سوودێكی نابێت".

 

نەتەوەیەکگرتووەکان داوا لە ئێران و لایەنەکانی دیکە دەکات، پابەندی رێککەوتنە ئەتۆمییەکە بن.

 

یەکێتی ئەوروپاش جەخت لە رێزگرتن لە رێککەوتنەکە دەکاتەوە و دەشڵێت، پێویستە هەمووان لەهەموو جۆرە کردەوە و رەفتارێک دووربکەوینەوە کە دەبێتەهۆی لەناوبردنی رێککەوتنەکە.