لە ساڵێکدا رێژەی بێکاریی گەنجان لە سنە 3.8٪ زیادیکردووە

 

بەپێی دوایین راپۆرتی ناوەندی ئاماری ئێران، رێژەی بێکاری لە پارێزگای سنە لە ساڵی 1401ـی هەتاویدا، 20.5٪ و دوو هێندەی رێژەی بێکاری هەموو ئێرانە کە 9.7٪ـە. بەگوێرەی ئەو راپۆرتە؛ لە یەکساڵی رابردوودا رێژەی بێکاریی گەنجانی پارێزگای سنە 3.8٪ بەراورد بە ساڵی پێشووتر زیادیکردووە. 92 هەزار و 453 گەنجی خاوەن بڕوانامە لە پارێزگای سنە، کاریان نییە کە دەبێتە 6٪ـی ژمارەی دانیشتووانی ئەو پارێزگایە.

 

ئەم ئامارانە بە جۆرێک خەڵکی پارێزگاکەی بێهیوا کردووە و بەو بڕوایەی گەیاندوون، کێشەکانیان بە هۆکاری سیاسی و بوونی جیاوازییەوە، لە لایەن دەسەڵاتەوە لە ناوەند، هەوڵی چارەسەرکردنی بۆ نادرێت.

 

پارێزگاری سنە چەند مانگ پێش ئێستا باسی لە رەخساندنی هەلی کار بۆ نزیکەی 34 هەزار گەنجی ئەو پارێزگایە تەنیا لەماوەی یەکساڵی رابردوودا کردبوو، بەڵام میدیاکانی سەربە حکومەت ئەو گوتانەی رەتدەکەنەوە و دەڵێن: کێشەی بێکاریی گەنجانی پارێزگای سنە دەبێ لە لایەن دەسەڵاتەوە چارەسەر بکرێت نەک لە لایەن بەرپرسانی پارێزگاکە.

 

غوڵامحوسێن موحسێنی ئێژەیی، سەرۆکی دەسەڵاتی دادوەری ئێران دەڵێت، "یەک لە بابەتە گرنگەکانی پارێزگای سنە، کاروپیشەی خڵک و رەخساندنی هەلی کارە بۆ گەنجان کە دەبێتە هۆی گەشەی ئابووریی پارێزگاکە و ئاسایشی وەبەرهێنان. دەمانەوێ ئەو کێشانەی کە خەڵک لەم بوارەدا هەیانە، چارەسەریان بکەین و هیوامان ئەوەیە ئەم کێشانە لە نزیکەوە تاوتوێ بکەین و بەپێی توانا و دەسەڵاتمان لەگەڵ پەرلەمان و حکومەت، هەنگاوی ئەرێنی هەڵبگرین بۆ چارەسەرکردنیان."

 

لە راپۆرتەکانی ناوەندی ئاماری ئێراندا، پارێزگاکانی رۆژهەڵاتی کوردستان بەردەوام لە پلەکانی یەکەمی خراپترین پارێزگاکانی ئێراندان لە رووی رێژەی بێکاری و هەڵاوسانەوە و لە دوایین ئاماری ئەو ناوەندەدا، پارێزگای سنە یەکەم و پارێزگای کرماشانیش بە رێژەی 16.7٪ بە دووەم خراپترین پارێزگاکانی ئێران تۆمارکراون.