شەوی رابردوو لە فەلەستین 400 کەس بەهۆی بۆردوومانەکانی ئیسرائیلەوە گیانیان لەدەستداوە

 

یۆئاڤ گالانت، وەزیری بەرگری ئیسرائیل هەڕەشەی توند دەکات و دەڵێت، "مانگێک، دوو مانگ سێ مانگ دەخایەنێت، دواجار حەماس نامێنێت. پێش ئەوەی حەماس بگاتە لای تانک و هێزی وشکانیمان، بۆردوومانی هێزە ئاسمانییەکانمان دەگاتە لایان."

 

سوپای ئیسرائیل دەڵێت، لە 24 کاژێری رابردوودا زیاتر لە 300 هێرشی ئاسمانی بۆ سەر کەرتی غەززە ئەنجامداوە و ئاماژە بەوەش دەکات، مەبەست لەو هەنگاوە وێرانکردنی ژێرخانی چەکداریی بزووتنەوە چەکدارییەکە بووە. 

 

بەڵام بەرپرسانی کەرتی غەززە دەڵێن، ئیسرائیل دەست لە هیچ شوێن و کەسێک ناپارێزێت و تەنیا لە هێرشێکیاندا نزیکەی 60 کەسی سڤیلی کوشتووە.

 

شەیادا حیلۆ، دانیشتوویەکی غەززەیە، لەسەر بۆردوومانی شارەکەیانەوە باس لەوەدەکات، "ئێمە خەوتبووین و نزیکەی کاژێر 1ـی شەو بوو، کاتێک گوێبیستی تەقینەوەیەکی گەورە بووین و دەرگە و پەنجەرە بە ماڵەکەمانەوە نەما و دووکەڵ و تاریکی تێکەڵبوون."

 

بەگوێرەی بەرپرسانی غەززە، تەنیا لە 24 کاژێری رابردوودا لانیکەم 400 کەس لە فەلەستین کوژراون. بەو جۆرەش ژمارەکە لە 7ـی مانگەوە لە فەلەستین گەیشتە چوار هەزار و 741 کەس.

 

لە ئیسرائیلیش هەزار و 405 کەس لە ئەنجامی هێرش و مووشەکەکانی گرووپە چەکدارەکانی کەرتی غەززەوە کوژراون.