دیمەنی کۆبوونەوەکەی سەرۆکی هەرێمی کوردستان و وەزیری دەرەوەی تورکیا
رووداو دیجیتاڵ
سەرۆکی هەرێمی کوردستان و وەزیری دەرەوەی تورکیا لە میونشن کۆبوونەوە.
سەرۆکایەتیی هەرێمی کوردستان دەڵێت، لە کۆبوونەوەکەدا پەیوەندییه‌كانى عێراق و هەرێمی کوردستان له‌گه‌ڵ تورکیا تاوتوێ کران، هەروەها باسيان له چۆنيه‌تيى بەهێزکردنی هاوکاری لە بوارى سیاسی، ئابووری و ئەمنيدا كرد و تيشكيان خسته‌سەر پێشهاتە ئەمنی و سیاسییەکانی عێراق و سووریا و ناوچەکە.
نێچیرڤان بارزانی جەختی لەسەر بره‌ودان به پەیوەندیی دۆستانه‌ى هه‌رێمى كوردستان لەگەڵ تورکیا له‌سه‌ر بنه‌ماى به‌رژه‌وه‌نديى هاوبه‌ش کردەوە و ئاماژەی به گرنگيى هاريكاريى هاوبەش لەگەڵ تورکیا لە هەموو بوارەکان، بەتایبەتی له بوارى ئاسایش و سەقامگیریى ناوچه‌كه‌دا، كرد.
سەرۆکایەتیی هەرێمی کوردستان دەڵێت، هاکان فیدان "خواستى تورکیای بۆ بەهێزکردنی زياترى پەیوەندییەکانى لەگەڵ عێراق و هەرێمی کوردستاندا نيشان دا، هەروەها جەختی لەسەر گرنگیی هەماهەنگیی هاوبەش بۆ رووبەڕووبوونەوەی ئاڵنگارييه ئەمنییەکان و کارکردن بۆ بەدیهێنانی سەقامگیری و گەشانەوە لە ناوچەکەدا کردەوە".
وەزارەتی دەرەوەی تورکیاش لە بارەی کۆبوونەوەکە لە تۆڕی کۆمەڵایەتیی ئێکس نووسی: "وەزیرمان هاکان فیدان لە چوارچێوەی کۆنفرانسی ئاسایشی میونشن لەگەڵ نێچیرڤان بارزانی، سەرۆکی ئیدارەی هەرێمیی کوردیی عێراق کۆبوونەوە."
کۆنفرانسی ئاسایشی میونشن دوێنی 14ـی مانگ بە بەشداریی دەیان سەرۆک و وەزیری وڵاتان دەستیپێکرد.
پرسە گرنگەکانی کۆنفراسەکە، جەنگی غەززە، رووسیا - ئۆکراینا و دۆخی سووریان.
دووەم رۆژی کۆنفرانسەکە، رۆژێکی مێژوویی بوو بۆ دیپلۆماسییەتی سەرۆکی هەرێمی کوردستان، کە تێیدا لەگەڵ بەرپرسانی هەرە باڵای ئەمریکا و ئەورووپا کۆبووەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ