کوردەکانی قاعیدە؛ ناکۆکیی نوێی ئێران و ئەمریکا

 

 

موختار هۆشمەند، لێکۆڵەر و شارەزا لە کاری گرووپە جیهادییەکان ئاماژەی بە بوونی پەیوەندیی لەنێوان کۆماری ئیسلامیی ئێران و گرووپە جیهادییەکانی سەر بە رێکخراوی قاعیدە کرد.

 

ئەو لێکۆڵەرە لەبارەی سەرەتای کار و چالاکیی ئەنسارولئیسلام لە ئێران دەڵێت، بوونی ئەندامانی قاعیدە لە ئێران دەگەڕێتەوە بۆ دوای ساڵی 2003 و کۆچکردنی ئەندامانی ئەنسارولئیسلام بۆ رۆژهەڵاتی کوردستان، لە ساڵی 2005 بەدواوە لە زۆربەی لە شارەکانی رۆژهەڵاتی کوردستان خۆیان رێکخست، ساڵی 2005 بۆ 2008 بە ساڵانی زێڕینی ئەم گرووپانە دادەنرێن لە رۆژهەڵاتی کوردستان، لەژێر ناوی کەتائیبی کوردستان و کەتائیبەکانی ئەهلی سوننە خۆیان رێکخست، زۆربەی گرووپەکان بڕوایان وابوو نابێت دژی ئێران چالاکی ئەنجام بدرێت، بەڵام بەشێکی دیکە لە گرووپەکان رایان وابوو دەبێت دژی ئێران چالاکی ئەمجامبدەن، بۆیە ئێران سنووری بۆ بەشێک لە جیهادییەکان دانا و دەستگیریکردن.

 

ناوچەکانی کرماشان، جوانڕۆ و پاوە شوێنی بەیەکگەیشتنی کوردانی شیعە، سوننە و یارسانە، مەلا حەسەن پێیوایە "لەو ناوچانەدا ژمارەی سەلەفییەتی جیهادیی قیتالی زیاترە، چونکە ئێران بەئەنقەست لەو شوێنانە دەستی ئاوەڵاکردوون". 

 

بە گوتەی مەلا حەسەن واژی: "ئێران دەیەوێت ئەو گرووپانە زۆر بەخراپیی بەسەر کورددا بشکێنێتەوە، مەبەستی ئەوەیە کێشە بۆ کورد دروستبکات، لەو کارەشی چەند ئامانجێکی هەیە: یەکەمیان ئەوەیە کە دانیشتووانی زنجیرە شاخی زاگرۆس لەت بکات وەکو کرماشان و ئیلام، چونکە ئەو ناوچانە سەرچاوەی نەوتی هەیە. بۆ ئەوەی کورد شەڕی زاراوە و ئایینی بکات، کورد لەت بکات و هێندەی دیکە کورد بچووک بکاتەوە، هەروەها دەیانەوێت شەڕی یارسانەکان دروستبکەن، بۆ ئەوەی دۆخێک بەرهەمبهێنن کە کورد نەتوانێت لێی دەربچێت".