داعش بەرامبەر ئازادکردنی مۆلەر داوای 5 ملیۆن یۆرۆ دەكات
رووداو ـ CNN
سەرچاوەیەكی نزیك لە خانەوادەی كایلا مۆلەری كارمەندی فریاگوزاری ئەمریكی، كە چەند مانگێكە لەلایەن رێكخراوی داعش دەستگیركراوە، رایگەیاند، رێكخراوی دەوڵەتی ئیسلامی (داعش) لە بەرامبەر ئازادكردنی كایلا داوای بڕی پێنج ملیۆن یۆرۆی كردووە.
سەرچاوەنزیکەکە لە خانەوادەی كایلا مۆلەر گوتوشیەتی: "رێكخراوی داعش 13ی مانگی ئابی داهاتووشی وەكو دوایین كات دیاریكردووە بۆ رادەستكردنی پارەكە پێش جێبەجێكردنی بڕیاری گوللـەبارانكردنی".
پێشتر رێكخراوی داعش رایگەیاند، كە كایلا مۆلەری، كارمەندی فریاگوزاری ئەمریكی بەهۆی هێرشێكی فڕۆكە جەنگییەكانی هاوپەیمانی نێودەوڵەتی بۆ سەر ئەو خانووەی تێیدا زیندانی كرابوو، كوژراوە. لەمبارەیەوە هاوپەیمانی نێودەوڵەتی دژی داعش رایگەیاندووە، کە تاوەكو ئیستا هیچ بەڵگەیەك نییە بیسەلمێنێت كایلا مۆلەر بەهۆی هێرشی فڕۆكە جەنگییەكانی هاوپەیمانی نێودەوڵەتی بۆ سەر بنكەكانی رێكخراوی داعش لە سووریاو عێراق كوژرابێت.