سەلاحەدین بەهائەددین لەگەڵ هاكان فیدان كۆبووەتەوە
رووداو- هەولێر
ئەمینداری گشتی یەكگرتووی ئیسلامی كوردستان لە ئەنقەرە لەگەڵ هاكان فیدان، راوێژكاری دەزگای هەواڵگریی توركیا (میت) و یاریدەدەرێكی سەرۆك كۆماری توركیا كۆبووەتەوە. بەرپرسی پەیوەندییەكانی یەكگرتووی ئیسلامی دەڵێ "متمانە لە نێوان هەولێر و ئەنقەرە نەمابوو". بەڵام "ئێستا ئەو بەستەڵەكە تواوەتەوە".
رۆژی 24/11/2017 سەلاحەددین بەهائەددین، ئەمینداری گشتیی یەكگرتووی ئیسلامیی بە یاوەری د.عومەر محەممەد، ئەندامی مەكتەبی جێبەجێكردنی ئەو حیزبە، دوور لە چاوی میدیاكان لە رێگەی دەروازەی ئیبراهیم خەلیلەوە پەڕینەوە باكووری كوردستان، لەوێش لە رێگای فڕۆكەخانەی شرناخەوە گەیشتنە ئەنقەرەی پایتەختی توركیا، ئەو پایتەختەی كە ماوەی دوو مانگە بە هۆی گشتپرسییەكەی 25ی ئەیلولەوە هەموو دەرگایەكی سیاسی بە رووی باشووری كوردستاندا داخستووە.
بەرپرسی پەیوەندییەكانی یەكگرتوو: بەستەڵەكی هەولێر و ئەنقەرە تواوەتەوە
سەردانەكە تەواو نهێنی بووە، بە جۆرێك پاسەوان و تیمی پرۆتۆكۆلی توركی زۆر بە وریاییەوە پێشوازیان لە شاندەكەی یەكگرتوو كردبوو، پێیانگوتبوون "ئێوە یەكەم شاندی كوردین لە دوای گشتپرسی".
نەسرەدین سندی، بەرپرسی پەیوەندییەكانی یەكگرتووی ئیسلامی كوردستان بە (رووداو)ی راگەیاند "سەردانەكەی ئەمنیداری گشتی هەنگاوێكی سەرەتایی باش و گرنگ بوو، ئەو بەستەڵەكەی كە بەهۆی ریفراندۆمەوە دروستبووە، توانی بیتوێنێتەوە. چوونی شاندی باڵای حكومەتی هەرێمی كوردستانیش لە رێگای توركیاوە بۆ فەرەنسا هەر دوای ئەم سەردانە هات".
دوو نامەكەی سەلاحەددین بەهائەددین
سەركردەیەكی یەكگرتوو كە ئاگاداری هەوڵەكانی ئەمیندارەكەیانە بۆ ئاساییكردنەوەی پەیوەندییەكانی هەولێر و ئەنقەرە، بە (رووداو)ی راگەیاند "مامۆستا سەلاحەددین لە ماوەی رابردوودا دوو نامەی بۆ ئەردۆغان ناردووە سەبارەت بە نەگرتنەبەری رێوشوێن دژی هەرێمی كوردستان و دەستنەبردن بۆ بژارەی سەربازی لە دەروازەی ئیبراهیم خەلیل".
ئەو سەركردەیەی یەكگرتوو كە نەیویست ناوی بڵاوبكرێتەوە، هەروەها دەڵێت: "جگە لەوە راشد غەنووشی، سەرۆكی پارتی نەهزەی تونسی كە دۆستی دێرینی هەر یەك لە سەلاحەدین بەهائەدین و ئەردۆغانە، هەوڵی رەخساندنی كۆبوونەوەی لە نێوان باشووری كوردستان و توركیا داوە. هەروەها پەیوەندییە كەسییەكانی خۆی لەگەڵ ئەردۆغان بەكارهێناوە بۆ ئەوەی لەو پلانە هەرێمییەی دژی باشووری كوردستان داڕێژراوە، دەستی سووك بكات".
رەجەب تەیب ئەردۆغان، سەرۆككۆماری توركیا، بە بەڕێوەچوونی گشتپرسیی باشووری كوردستان زۆر تووڕە بوو. ئەردۆغان گشتپرسییەكەی بە "خیانەت و خەنجەرلێدان لە پشتەوە" ناو برد، بۆیە لە ماوەی رابردوودا هەموو هەوڵ و دەستپێشخەرییەكی بۆ بینینی بەرپرسانی باڵای حیزبی و حكومی باشووری كوردستان رەتكردووەتەوە.
سەركردەیەكی یەكگرتوو: راشد غەنووشی داوای لە ئەردۆغان كردووە دەستی لە سزادانی كورد سووك بكات
بە گوتەی نەسرەددین سندی، سەردانەكەی ئەمیندار بۆ ئەنقەرە بەرهەمی هەبووە و دەڵێت: "ریفراندۆم بۆ توركیا موفاجەئە بوو، ئەم پرۆسەیە بەبێ راوێژ لەگەڵ ئەوان كراوە، بۆیە لە ماوەی رابردوودا جۆرێك لە نەمانی متمانە هەبوو، بەڵام مامۆستا سەلاحەددین لەم سەردانە توانی بەشێك لەو نیگەرانییانە بڕەوێنێتەوە. پێشتر مامۆستا لە ساڵی 2007 بە سەرۆكایەتی شاندێكی باڵا سەردانی توركیای كرد كە ئەوكات هەڕەشەی بەكارهێنانی هێزی سەربازی دژی هەرێمی كوردستان دەكرا".
سەلاحەددین بەهائەددین، چوار رۆژ لە توركیا مایەوە و رۆژی 28/11/2017 گەیشتەوە شاری دهۆك، لەوێ لە كۆنگرەیەكی رۆژنامەڤانیدا سەبارەت بە سەردانەكەی رایگەیاند "كەسایەتییە كاربەدەست و كاریگەرەكانمان لە ئاكپارتی و حكومەت بینی، تارادەیەك سەردانێكی دڵخۆشكەر و سەركەوتوو بوو، سوپاس بۆ خوا بەرەوپێشچوون هەبوو".
سەلاحەدین بەهائەدین شانازی بە هەڵوێستی حیزبەكەی سەبارەت بە پشتیوانی و بە ئەنجامگەیاندنی گشتپرسی كرد و رەتیكردەوە پەشیمان بن لە هەڵوێستەكانیان و گوتی "ریفراندۆم تەعبیر بوو، تاوان نییە حەقی عقوبە و ئینتیقام نییە، چۆن ئامادەبووین بۆ ریفراندۆم و جێگای شانازییە، ئامادەشین بۆ چارەسەركردنی شوێنەوارەكانی و باجەكانی، یەكگرتوو خۆی لە بەرپرسیارێتی نادزێتەوە".
دانیشتن لەگەڵ هاكان فیدان
رەجەب تەیب ئەردۆغان، سەرۆککۆماری تورکیا لەکاتی ئەنجامدانی پەیوەندیی تەلەفۆنی لەگەڵ دۆناڵد ترەمپ، سەرۆکی ئەمریکا بە ئامادەبوونی هاکان فیدان، راوێژکاری میت
ئەو سەرچاوەیەی یەكگرتوو سەبارەت بە كۆنەبوونەوەی سەلاحەدین بەهائەدین و ئەردۆغان گوتی: "ئەردۆغان لەم قۆناغەدا نایەوێ هیچ سەركردەیەكی باشووری كوردستان ببینێ، بەڵام بینینی بەرپرسانی باڵای حكومەت و ئاكپارتی بە ئاگاداری و رێپێدانی خودی سەرۆككۆمار بووە، چونكە ئەردۆغان هاوكات سەرۆكی حیزبیشە. ئەوەی بەلای یەكگرتووەوە گرنگ بوو گەیاندنی پەیام و سیاسەتی هەرێمی كوردستان بوو بە توركیا كە لاوازبوون و نەمانی قەوارەی سیاسی و ئیداریی هەرێمی كوردستان بە پلەی یەكەم بە زیانی توركیایە".
نەسرەدین سندی، بەرپرسی پەیوەندییەكانی یەكگرتووی ئیسلامی دەڵێ: "بە روونی بە بەرپرسانی باڵای حكومی و حیزبی توركیمان راگەیاندووە كە ئەم دابڕان و دوورییە لە نێوان كوردستان و توركیا لە بەرژەوەندی ئەوان نییە، بەرژەوەندیی هاوبەش لە نێوان هەردوولامان هەیە و پێویستە بپارێزرێن".