بەهۆی هێرشی ئیسرائیل بۆ سەر قوتابخانەیەک لە غەززە 17 کەس کوژران

 

 

بەرپرسانی فەڵەستینی سەر بە کەرتی غەززە رایانگەیاند، لەو هێرشەدا جگە لە کوژرانی 17 کەس، چەندینی دیکەش بریندار بوون.

 

بەگوێرەی شایەتحاڵان، فڕۆکە جەنگییەکانی ئیسرائیل لانیکەم سێ بۆمبیان هەڵداوەتە سەر قوتابخانەی حەمامە و تاوەکو درەنگی شەوی شەممە خۆبەخشان لە هەوڵی دەرهێنانی قوربانییان بوون، کە ژن و منداڵیشیان تێدایە.

 

سوپای ئیسرائیل رایگەیاند، قوتابخانەکە لەلایەن حەماسەوە وەکو سەنتەرێکی فەرماندەیی بەکارهێندراوە. چەکداران خۆیان و چەکیان تێدا شاردووەتەوە.

 

حەماس هێرشی سەر قوتابخانەکەی سەرکۆنە کرد و رەتیکردەوە قوتابخانەکەیان بەکارهێنابێت.

 

بەگوێرەی دوایین ئاماری وەزارەتی تەندروستیی غەززە، تاوەکو ئێستا 39550 کەس لە غەززە کوژراون.

 

دوای ئەوەی لە 7ی ئۆکتۆبەر چەکدارانی حەماس پەلاماری ئیسرائیلیان دا، 1197 کەسیان کوشت و 251 کەسیان بە بارمتە گرت، کە 111 کەسیان هێشتا لە غەززە ماون، ئیسرائیل هێرشی کردە سەر غەززە.