فراکسیۆنی یەکگرتوو لە پەرلەمانی کوردستان سەرۆک و جێگری دیاریکرد

 

ئەمڕۆ شەممە، 30ـی تشرینی دووەمی 2024، مستەفا عەبدوڵڵا، سەرۆکی فراکسیۆنی یەکگرتوو بە تۆڕی میدیایی رووداوی راگەیاند، "بە ئامادەبوونی د. محەممەد ئەحمەد، سەرۆکی دەستەی باڵای چاودێریی فراکسیۆنی یەکگرتوو لە پەرلەمانی کوردستان، کۆبوونەوەیەک بەڕێوەچوو و باسی یەکەم دانیشتنی پەرلەمانی کوردستان کرا و سەرۆک و جێگری فراکسیۆنەکە دیاریکرا."

 

سەرۆکی فراکسیۆنی یەکگرتوو گوتی، "ئێمە 7 ئەندامین لە فراکسیۆنەکەمان، رێککەوتین لەسەر پۆستەکان و دابەشمان کردن، من بە سەرۆکی فراکسیۆن، هەڵز ئەحمەد، بە جێگیری سەرۆکی فراکسیۆن و بوخاری جەمیل، بە بڕیاردەر دیاریکران."

 

بە گوتەی مستەفا عەبدوڵڵا، "بۆیە پۆستەکانیان وا دابەشکردووە بۆ ئەوەی لە هەموو شارەکاندا هەبن. مستەفا عەبدوڵڵا لە سلێمانی، هەڵز ئەحمەد لە دهۆک و بوخاری جەمیل لە هەولێر."

 

لەبارەی بەشداریکردنیان لە یەکەم دانیشتنی پەرلەمان، سەرۆکی فراکسیۆنی یەکگرتوو دەڵێت، "وەک هێزێکی ئۆپۆزیسیۆن بەشداریی یەکەم دانیشتن دەکەین، بەڵام مکوڕین لەسەر ئەوەی وەکو ئۆپۆزیسیۆن بمێنینەوە."

 

ئەمڕۆ شەممە، 30ـی تشرینی دووەمی 2024، سامان ئەحمەد، بەڕێوەبەری راگەیاندنی پەرلەمانی کوردستان بە تۆڕی میدیایی رووداوی راگەیاند، "هەموو ئامادەکارییەکانی پەرلەمان بۆ یەکەم دانیشتنی خولی شەشەمی پەرلەمانی کوردستان تەواوبوون و لیژنەیەک بۆ پێشوازی لە پەرلەمانتارانی نوێ پێکهێندراوە."

 

بە گوێرەی ئەو راگەیێندراوەی ئەمڕۆ پەرلەمانی کوردستان بڵاویکردووەتەوە، دانیشتنەکە رۆژی دووشەممە، 2ـی کانوونی یەکەم کاژێر 11:00ـی پێشنیوەڕۆ دەکرێت.

 

 

یەکەم: کردنەوەی دانیشتنەکە بە چەند ئایەتێک لە قورئانی پیرۆز.

 

دووەم: یەک خولەک راوەستان بۆ گیانی پاکی شەهیدانی کوردستان.

 

سێیەم: بانگهێشتی بەتەمەنترین بەربژێری ئامادەبوو لە پاڵێوراوانی سەرکەوتووی خولی شەشەمی پەرلەمانی کوردستان لەلایەن سەرۆکی دیوانی پەرلەمان بۆ سوێندخواردن و بەڕێوەبردنی دانیشتنەکە، بەپێی حوکمی بڕگەی دووەم لە 11 و بڕگەی یەکەم لە مادەی 12ـی پەیڕەوی نێوخۆی پەرلەمان.

 

چوارەم: سەرۆکی یەکەم دانیشتنی خولی شەشەم بەربژێرە هەڵبژێردراوەکان بۆ خولی شەشەمی پەرلەمانی کوردستان-عێراق بانگ دەکات بۆ سوێندخواردنی یاسایی بەپێی حوکمی بڕگەی دووەمی مادەی 12 لە پەیڕەوی نێوخۆی پەرلەمان، پاشان دانیشتنەکە لەلایەن سەرۆکی یەکەم دانیشتن بەپێی حوکمی مادەکانی پەیڕەوی نێوخۆی پەرلەمان بەڕێوەدەبرێت.

 

لە هەڵبژاردنی پەرلەمانی کوردستاندا کە 20-10-2024 بەڕێوەچوو، پارتی دیموکراتی کوردستان 39 کورسی بەدەستهێنا، دوای ئەویش یەکێتیی نیشتمانیی کوردستان بە 23 کورسی و نەوەی نوێ بە 15 کورسی لە پلەی دووەم و سێیەم بوون.

 

26ی تشرینی دووەمی 2024، دڵشاد شەهاب، گوتەبێژی سەرۆکایەتیی هەرێمی کوردستان لە کۆنفڕانسێکی رۆژنامەڤانیدا رایگەیاند، "ئەمڕۆ نێچیرڤان بارزانی، سەرۆکی هەرێمی کوردستان فەرمانی هەرێمیی ژمارە 417ـی ساڵی 2024 دەرکرد بۆ ئەوەی رۆژی دووشەممە 02-12-2024 کاژێر 11:00ـی پێش نیوەڕۆ یەکەم دانیشتنی خولی شەشەمی پەرلەمانی کوردستان بەڕێوەبچێت."