پاسەوانی سنوور: وەزارەتی ناوخۆی عێراق فەرمانی دامەزراندن دەربکات ناونووسین دەستپێدەکەین

 

لە رۆژی سێشەممە 29-11-2022ەوە دەنگۆی ئەوە بڵاوبووەتەوە کە هێزی زیاتری پاسەوانی سنوور لە سنووری نێوان رۆژهەڵاتی کوردستان و هەرێمی کوردستان جێگیر دەکرێت و دەرگای دامەزراندنیش بۆ سێ هەزار کەس بۆ پاسەوانی سنوور دەکرێتەوە، بەڵام پاسەوانی سنوور دەنگۆی دامەزراندنەکە رەتدەکەنەوە.

 

بەرەبەیانیی رۆژی چوارشەممە 30-11-2022، فەرماندەیی ناوچەی یەکی پاسەوانی سنوور کە ئەرکیان لە هەرێمی کوردستانە لە راگەیێندراوێکدا رایگەیاند: "دەنگۆی پێکهێنانی لیوایەک و دامەزراندن رەتدەکەینەوە و ئێستا بە فەرمی هیچ بابەتێکی دامەزراندن لە فەرماندەییەکەمان نییە." 

 

ئەمڕۆ چوارشەممە، عەقید کاروان خۆشناو، گوتەبێژی پاسەوانی سنوور - ناوچەی یەک بە تۆڕی میدیایی رووداوی گوت: "وا بڵاوکراوەتەوە کە گوایە لیوایەک دادەمەزرێت بۆ پاراستنی سنوورەکان و دەبێت هەموو ئەندامەکانی خەڵکی ئەو ناوچانە بن کە ئەرکیان تێیدا دەبێت. ئێمە هەموو ئەو دەنگۆیانە رەتدەکەینەوە و تاوەکو ئێستا هیچ فەرمانێکی دامەزراندنمان بۆ نەهاتووە." 

 

عەقید کاروان خۆشناو ئاماژەی بەوەش کرد کە دامەزراندن لە پاسەوانی سنوور فەرمانی وەزارەتی ناوخۆی عێراقی دەوێت و گوتیشی: "هەرکات فەرمانەکە گەیشتە ئێمە، بە فەرمی رایدەگەیێنین و بەگوێرەی ئەو مەرجانەی وەزارەتی ناوخۆی عێراق دیارییان دەکات ناونووسین بۆ دامەزراندن دەستپێدەکەین." 

 

فەرماندەیی ناوچەی یەکی پاسەوانی سنوور کە سەر بە حکومەتی عێراقە، ئەرکی پاراستنی سنوورەکانە لە زاخۆوە تاوەکو خانەقین.