لە رووداوێکی هاتووچۆدا لە قەرسی باکووری کوردستان حەوت کەس گیانیان لەدەستدا

 

پاسەکە بەیانیی ئەمڕۆ یەکشەممە، 30ـی تەممووزی 2023، بە ژمارەیەک سەرنشینەوە لە بورسای تورکیا بەرەو قەرسی باکووری کوردستان بەڕێکەوتووە و لە لۆفەکانی کاراکورت سەر بە شارۆچکەی قامووشان لە قەرس لە بەرزایی 50 مەترەوە کەوتووەتە نێو دۆڵێکەوە. 

 

تیمەکانی ئافاد، پۆلیس، جەندرمە و تەندروستی گەیشتنە شوێنی رووداوەکە و ئەو بریندارانەیان هێنایە دەرەوە کە لە نێو پاسەکەدا گیریانخواردبوو. 

 

بەگوێرەی زانیارییە سەرەتاییەکان؛ لە ئەنجامی وەرگەڕانی پاسەکەدا حەوت کەس گیانیان لەدەستداوە و 22ـی دیکەش بریندارن.

 

بریندارەکان بە ئامبووڵانس گوازرانەوە بۆ نەخۆشخانەکانی ئەرزەڕۆم و قەرس. یەکێک لە بریندارەکان کە تەندروستی ناجێگیربوو، بە هێلیکۆپتەرێکی ئەمبولانس گواسترایەوە ئەرزەڕۆم.