خوێندکارانی بەشدار لە پرۆگرامێکی حکومەتی عێراق تێچووی مانەوەیان زیاد دەکرێت

 

 

ئەمڕۆ سێشەممە 29ی تشرینی یەکەم عەباس ئەکرەم، گوتەبێژی وەزارەتى خویندنی باڵا و توێژینەوەی زانستیی هەرێمی کوردستان بە تۆڕی میدیایی رووداوی راگەیاند، کۆمەڵێک بڕیار لە بەرژەوەندیى ئەو خوێندکارانە دراوە کە لەو پرۆگرامەدا بەشدار دەبن.

 

 

1- خوێندکارەکان دەتوانن لە هەرێمى کوردستان دەستەبەرى بکەن. وەزارەتى خوێندنى باڵا و توێژینەوەى زانستى دەبێتە لایەنى سێیەم لەو دەستەبەریە.

 

عەباس ئەکرەم دەڵێت، "پێشتر دەبوو بەربژێرەکان بچوونایەتە بەغدا و لەوێ دەستەبەرییان بکردایە."

 

2- رەزامەندی وەرگیراوە بۆ گۆڕینى پسپۆڕیى بەربژێرەکان، بەو مەرجەى هەر بەربژێرێک کە دەخوازێت پسپۆڕییەکەى بگۆڕێت، لارینەبوونى فەرمانگەى نێردراوان و پەیوەندییە رۆشنبیرییەکان لە وەزارەتى خوێندنى باڵا و توێژینەوەى زانستى هەرێمى کوردستان وەربگرێت.

 

3- بڕیادراوە بە زیادکردنى تێچووی مانەوەی مانگانە بۆ ئەو بەربژێرانەی سەڵەتن لە 1700 دۆلارەوە بۆ  2200 دۆلار؛ ئەوانەش کە خێزانیان هەیە لە 2700 دۆلارەوە بۆ 3700 دۆلار زیادکراوە.

 

4- وردەکارىی تەواو سەبارەت بە بیمەى تەندروستى، تێچووى گەشتکردن، کرێى خوێندنى ساڵانە، دابینکردنى پێداویستیەکان، کۆرسى زمان، کرێى چاپکردنى نامەى ماستەر و تێزى دکتۆرا بەپێى پسپۆڕییەکان دیاریکراوە.

 

گوتەبێژی وەزارەتی خوێندنی باڵا و توێژینەوەی زانستی گوتی، "ئەوە دەستکەوتە بۆ بەربژێرەکان تاوەکو لە ژینگەیەکى لەبار و باشتر بتوانن بەشێوەیەکى سەرکەوتووانە خوێندن لە وڵاتان تەواو بکەن."

 

هەفتەی رابردوو شاندێکی وەزارەتى خوێندنی باڵا و توێژینەوەی زانستی سەردانی بەغدای کرد، بە ئامانجى چارەسەرکردنى ئەو گرفت و ئاستەنگانەى رووبەڕووى خوێندکارانی وەرگیراوی هەرێمى کوردستان لە پرۆگرامی (لیژنەی باڵای پەرەپێدانی خوێندن لە عێراق) دەبنەوە.

 

24ی تەمموزی 2023 سەرۆکوەزیرانی عێراق دەستپێشخەری ناردنی 5 هەزار کەسی بۆ خوێندن لە دەرەوەی وڵات راگەیاند کە لیژنەی باڵای پەرەپێدانی خوێندن لە عێراق سەرپەرشتی دەکات و هەموو پارێزگاکانی عێراق و هەرێمی کوردستان تێیدا سوودمەند دەبن.

 

بە گوێرەی مەرج و رێنماییەکانی ئەو بەرنامەیە، بۆ خوێندنی ماستەر پێشکەشکار نابێت تەمەنی لە 30 ساڵ زیاتر بێت و بۆ خوێندنی دکتۆرا نابێت تەمەنی لە 35 ساڵ زیاتر بێت؛ هەروەها بۆ ئەم قۆناخەی پێشکەشکردن، دەبێت فەرمانبەر بێت لە یەکێک دامەزراوەکانی حکومەتی هەرێمی کوردستان یان حکومەتی فیدراڵی.