رووداو دیجیتاڵ
هاونیشتمانییەک لە پارێزگای سەمسووری باکووری کوردستان بە تۆمەتی ئەندامێتی و بوونی پەیوەندی لەگەڵ پارتی کرێکارانی کوردستان - پەکەکە دەستگیرکرا و دوای لێپرسینەوەش زیندانی کرا.
ئۆپەراسیۆن دژی پەکەکە لە پارێزگاکانی باکووری کوردستان و تورکیادا بەردەوامە و ئەمڕۆ هەینی، 29-9-2023، تیمەکانی فەرماندەیی جەندرمەی سەمسوور کەسێکیان دەستگیرکرد. بەگوێرەی بەدواداچوون و راپۆرتی داواکاری گشتیی سەمسوور، ئەو کەسە گومانی ئەوەی لێدەکرێت ئەندامی پەکەکە بێت یان پەیوەندیی لەگەڵیدا هەبێت.
ئەو هاونیشتمانییە بەناوی (ئـ ئـ) لە ماڵەکەی خۆیدا دەستگیرکرا و لە بارەگای فەرماندەیی جەندرمە لێپرسینەوەی لەگەڵ کرا؛ دواتریش راپێچی خانەی داد کرا و بە بڕیاری دادوەری ئێشکگر خرایە گرتووخانە.
دوای شکستهێنانی پرۆسەی چارەسەری پرسی کورد لە کۆتاییەکانی ساڵی 2015دا، شەڕی کۆڵان بە کۆڵان لە نێوان سوپا و هێزە ئەمنییەکانی تورکیا دژی گەریلاکانی پەکەکە لە شەش پارێزگای باکووری کوردستان دەستیپێکرد و تاوەکو نیسانی 2016 بەردەوام بوو.
لە سەرەتای ساڵی 2017ـەوە ژووری ئۆپه‌راسیۆنه‌كانی وه‌زاره‌تی ناوخۆی توركیا شەش زنجیرە ئۆپەراسیۆنی ئەمنی و سەربازی لە باکووری کوردستان بەناوەکانی "شکێنەر، تەڵە، هەورە برووسکە، باگۆک، ئەرەن و ئابڵوقە" لە دژی گەریلاکانی پەکەکە لە زۆربەی ناوچە شاخاوییەکان و دوورەدەستەکان لە باکووری کوردستان دەستپێکردووە. هێشتا راگەیاندنی ناوچەی ئەمنی و قەدەخەی هاتووچۆ لە چەندین شوێنی باکووری کوردستاندا درێژەی هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ