لە گۆیژەی سلێمانی شەش گورگ دەبیندرێن

 

رۆژی چوارشەممە، 28-9-2022، ملکۆ بازیانی، سەرۆکی پارتی سەوزی کوردستان بە تۆڕی میدیایی رووداوی گوت: "تیمی شاخەوانیمان هەیە، دوێنێ لە گۆیژە گەلەگورگێکیان بینیوە؛ ژمارەیان شەش گوإهێرگ بووە و مەترسیی پەلاماردانی هاونیشتمانییان هەیە ئەگەر بچنە سنوورەکە".

 

بازیانی ئاماژەی بەوەش کرد کە گورگەکان بەهۆی ئەوەی "زۆر برسین" و تێکەڵی سەگی بێلانەبوون، مەترسیی پەلاماردانی هاونیشتمانییانیان هەیە. گوتیشی: "گرووپەکانی شاخەوانی دەبێت ئاگاداربن و پێویستە لایەنی پەیوەندیداریش بێنە سەر هێڵ".

 

هەر ئەمڕۆ چوارشەممە، عەمید هێمن کەمەرخان، بەڕێوەبەری راگەیاندنی پۆلیسی دارستان و ژینگەی پارێزگای سلێمانی بە تۆڕی میدیایی رووداوی گوت: "لە گۆیژە گورگ هەیە و راستە، بەڵام گورگ بەدوای خۆراکی خۆیدا دەگەڕێت و پەلاماری ئاژەڵ دەدات".

 

کەمەرخان ئاماژەی بەوەش کرد کە گورگ یەکێکە لە ئاژەڵە "دڕندە" و گۆشتخۆرەکان، بەڵام ئازاری مرۆڤ نادات. گوتیشی: "مەگەر کەسێک تەنیا بێت، یان منداڵ بێت، ئەگەرنا مەترسیی لەسەر ژیانی مرۆڤ دروستناکات".

 

بەڕێوەبەری راگەیاندنی پۆلیسی دارستان و ژینگەی پارێزگای سلێمانی گوتیشی، لە رابردوودا لە باخێکی گەڕەکی راپەڕینی سلێمانی دوو گورگ 10 ئاسکیان خنکاندووە. دەشڵێت: "نەوەکو گورگ، پڵنگیش بینراوە لەلایەن چەند کەسێکەوە پەلاماری کەسیانی نەداوە؛ ئەوانە گۆشتخۆرن، بەڵام شەرمنن و پەلاماری هەموو کەسێک نادەن".

 

چیای گۆیژە بەهۆی نزیکی لە ناوەندی شاری سلێمانی و لەباری کەشوهەواکەیەوە بەتایبەت لە رۆژە گەرمەکاندا، بە شەو و رۆژ گەشتیاران و هاونیشتمانییان بۆ بەسەربردنی کاتەکانیان رووی تێدەکەن.