شۆڕش ئیسماعیل بۆ کۆلێژێکی سەربازیی زاخۆ: ئێوە بنەمای لەشکرێکی یەکگرتووی نیشتمانین

 

 

میران بەکر، لێپرسراوی راگەیاندنی وەزارەتی پێشمەرگە و بەڕێوەبەری نووسینگەی وەزیری پێشمەرگە رایگەیاند، ئه‌مڕۆ 28ی شوباتی 2021 شۆڕش ئیسماعیل، وه‌زیری پێشمه‌رگه‌ی حكومه‌تی هه‌رێمی كوردستان، به ‌یاوه‌ری سەربەست لەزگین، بریکاری وەزارەت و فه‌ریق جه‌مال محەممەد، سه‌رۆكی ئه‌ركان و جێگرانی سه‌رۆک ئه‌ركان بۆ ئۆپه‌راسیۆنه‌كان و ئیداره‌ و میره‌، كۆلێژی سه‌ربازیی دوو (زاخۆ)ی به‌سه‌ركرده‌وه‌.

 

وه‌زیری پێشمه‌رگه‌ دەڵێت، بە هەموو شێوەیەک هاوکار و پاڵپشتی کۆلێژەکەن و "ئەوەی لە توانای وەزارەتی پێشمەرگە بێت بۆ ناوەندێکی وەها گرنگی ئەکادیمیی سەربازی درێخی ناکەین". ئاماژەی بەوەش کرد "ئەو قوتابی و خوێندکارانەی لێرەوە دەردەچن، دەبنە بنه‌ما و داهاتووی دروستكردنی سوپایه‌كی نیشتمانی و سەردەمیانە، بۆیە ده‌بێت هه‌مووان له‌ئاست ئه‌و به‌رپرسیارێتییه‌ گه‌وره‌یه‌دا بن و گرنگی و په‌ره‌ به ‌توانا جه‌سته‌یی و هزرییه‌كانی قوتابیان بدەن و له‌و رێگه‌یه‌وه‌ به‌رده‌وام په‌یڕه‌وی له‌ جێبه‌جێكردنی دیسپلینی سه‌ربازی بكه‌ن و ئینتیمای نیشتمانی و نه‌ته‌وه‌ییان به‌رزبكه‌نه‌وه"‌.

 

لە وێستگەیەکی دیکەی سەردانەکەیدا، شۆڕش ئیسماعیل و شاندی یاوەری، فەرماندەیی میحوەری رۆژئاوای دیجلەی لە سنووری سحێلا بەسەرکردەوە و لە دیدارێکدا، مەترسییەکانی ئێستای داعش و جمجۆڵەکانی ئەم دواییەیان لەگەڵ بەرپرسانی میحوەرەکە گفتوگۆ کرد.

 

شۆڕش ئیسماعیل داوای لە پێشمەرگەکان کرد، "وەکو هەمیشە ئازایانە و لەخۆبردووانە لە سەنگەرەکانی پاراستنی خاکی کوردستان رۆڵ بگێڕن".