رووداو
رووداو دیجیتاڵ
بەرەبەیانی ئەمڕۆ لە کەرکووک دەستڕێژی گولـلە لە ماڵی بەرپرسی پێشووی مەڵبەندی یەکێتیی نیشتمانی لە کەرکووک کرا. ئەو بەرپرسە دەڵێت، زیانی گیانی نەبووە.
تەقەکردنەکە کاژێر 02:18ی بەرەبەیانی رۆژی شەممە بووە. محەممەد عوسمان، بەرپرسی پێشووی مەڵبەندی یەکێتی لە کەرکووک بە رووداوی گوت، "دوای رووداوەکە چووینە ئەو شوێنەی تەقەی لێوە کرابوو. ئۆتۆمبێلێکی ئۆپڵ لە شۆستەکەی داوە و تێکچووە و جێهێڵدراوە، کە پێدەچێت تەقەکەرەکان بەکاریان هێنابێت."
بارەگاکە لە گەڕەکی عەرەفەی کەرکووکە؛ محەممەد عوسمان دەڵێت، رووداوەکە زیانی گیانیی نەبووە. گوتیشی، "بەگوێرەی ئەزموونمان، گوللـەکان گوللـەی کڵاشینکۆڤ نین و گەورەترن."
هەر ئەمڕۆ و نزیک کاژێر 03:00ی بەرەبەیان، تەقە لە بارەگای لقی 3ی پارتی دیموکراتی کوردستان لە کەرکووک کرا. ئارام جەباری، کارگێری لقەکە بە رووداوی گوت، "لە پشتی بارەگای لقەوە دەستڕێژ لە بارەگاکە کرا و پاسەوانەکانیش دەستبەجێ وەڵامیان دایەوە. تەقەکردنەکە هیچ زیانێکی نەبووە."
بە گوتەی ئارام جەباری، تەقەکەرەکان پیادەبوون و دواوی رووداوەکە هەڵاتوون.
تاوەکو ئێستا پۆلیس و لایەنە ئەمنییەکانی کەرکووک هیچ روونکردنەوەیەکیان لەبارەی ئەو رووداوانەوە بڵاونەکردووەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ