بەهۆی بۆردوومانەوە لە 24 کاژێردا 'زیاتر لە 670' دۆنم زەوی لە بەرواری باڵا سووتاون

 

سەربەست سەبری، بەرێوبەری ناحیەی کانی ماسێ بە تۆڕی میدیایی رووداوی راگەیاند، "بێجگە لە گوندی هروور و کۆمەڵگەی بریفکا، بەهۆی بۆردوومانی فڕۆکەکانی تورکیا ئاگر لە نزیک گوندێ بازێش کەوتووەتەوە" و دووکەڵێکی زۆر ئاسمانی ناوچەکەی گرتووەتەوە.

 

سەربەست سەبری گوتیشی، "لە دوێنێوە زیاتر لە 670 دۆنم زەوی سووتاون، زۆربەی ئەو دارانەی سووتاون دار بەڕوون لەگەڵ هەندێ لە رەز و بێستانەکانی خەڵک".

 

ئەیاد هرووری، خەڵکی گوندی هروور لە ناوچەی بەرواری باڵا بە تۆڕی میدیایی رووداوی راگەیاند، "دوێنێ ئێوارە بەهۆی تۆپبارانی سوپای تورکیا ئاگر لە ئاقاری گوندی هروور و کۆمەڵگەی بریفکا کەوتووەتەوە و ئاگرەکە هێشتا کۆنترۆڵنەکراوە". ئەو هاونیشتیمانییە گوتیشی "لەبەر مەترسییەکانی تۆپباران و بۆردوومان، کەس ناتوانێت بچێت بیکوژێنێتەوە".

 

ئۆپەراسیۆنی سوپای تورکیا بۆ سەر ناوچەی بەرواری باڵا لە 23ی نیسان دەستی پێکردووە و تاوەکو ئێستا بەردەوامە، لە ئەنجامدا پێنج گوندی ناوچەکە چۆڵکراون.