هەڵبژاردنی هەرێمی کوردستان لە میدیا جیهانییەکانەوە

 

دڵشاد شەهاب، گوتەبێژی سەرۆکایەتیی هەرێمی کوردستان رۆژی یەکشەممە 26ـی ئادار لە کۆنفرانسێکی رۆژنامەڤانیدا کاتی بەڕێوەچوونی هەڵبژاردنی خولی شەشەمی پەرلەمانی کوردستانی راگەیاند و گوتی، نێچیرڤان بارزانی، سەرۆکی هەرێمی کوردستان رۆژی 18ـی تشرینی دووەمی 2023ـی وەکو رۆژی بەڕێوەچوونی هەڵبژاردنی لە هەرێمی کوردستان دیاریکردووە. 

 

رۆژنامەی ئیندیپێندێنتی بەریتانی لەبارەی هەڵبژاردنی هەرێمی کوردستانەوە نووسیویەتی، "بەهۆی ناسەقامگیری و قەیرانی سیاسی، خولی پەرلەمان بۆ ماوەی ساڵێک دواخراوە"؛ دەشڵێت، پەرلەمانی هەرێمی کوردستان "رۆڵێکی گرنگ دەبینێت، بەو پێیەی متمانە بە حکومەت و سەرۆکی حکومەت دەدات و بڕیار لەسەر یاسا نیوخۆییەکانی هەرێمەکە دەدات". 

 

فرانس 24 لەسەر پرسی هەڵبژاردنەکان وێڕای ئەوەی باسی ناکۆکییە سیاسییە نێوخۆییەکان دەکات، لەبارەی پەیوەندییەکانی نێوان هەولێر و بەغدا دەڵێت، "زۆربەی جار ناکۆکیی نێوان حکومەتی هەرێمی کوردستان و حکومەتی ناوەند لە بەغدا لەسەر پرسی بەشە بودجەی هەولێر و بەڕێوەبردنی سەرچاوەکانی نەوتە لە هەرێمی کوردستان".  

 

رۆژنامەی لۆریێنت لوژووری فەرەنسی کە لە لوبنان دەردەچێت لەبارەی هەڵبژادنی هەرێمی کوردستانەوە نووسیویەتی: "ناکۆکیی پارتی و یەکێتی لەسەر پرسی بازنەکانی دەنگدان"، بە یەکێک لە ئەگەرە سەرەکییەکانی دواکەوتنی هەڵبژاردن لە هەرێمی کوردستان دادەنرێت. 

 

رۆژنامەی زە ناشناڵ کە لە ئەبوزەبیی ئیماراتەوە دەردەچێت، لەو بارەیەوە نووسیویەتی "بەرپرسانی هەرێمی کوردستان، کە هێزی ئەمنی و پێشمەرگەی هەیە، هەرێمەکەیان وەکو لانکەی سەقامگیری لە عێراقێکی پڕ لە پێکدادان وێنا کردووە".